देवरूख : पाटबंधारे विभागाच्या मध्यम प्रकल्पांतर्गत कालव्याचे काम अपूर्णावस्थेत असल्याने माखजन पंचक्राेशीतील शेतकऱ्यांच्या भातशेतीचे मोठ्या प्रमाणात नुकसान झाले आहे. कालव्याच्या बंदिस्त पाईपलाईनसाठी माखजन परिसरात खोदाई सुरू आहे.
खड्ड्यांमुळे नागरिक हैराण
रत्नागिरी : शहर परिसरामध्ये खड्ड्यांचे प्रमाण जास्त असल्याने लोकांचे हाल सुरू आहेत. वाहनधारक पाठीचे दुखण्याने त्रस्त झाले आहेत. त्यामुळे नगर परिषदेला जाग कधी येणार, असा प्रश्न केला जात आहे. याकडे लोकप्रतिनिधीही दुर्लक्ष करत असल्याने तीव्र नाराजी व्यक्त करण्यात येत आहे.
जैववैद्यकीय कचऱ्याची समस्या
चिपळूण : कोरोनाबाधित रुग्णांसाठी आधार ठरणाऱ्या कामथे उपजिल्हा रुग्णालयात सध्या कोविड जैववैद्यकीय कचऱ्याची समस्या निर्माण झाली आहे. या कचऱ्याची विल्हेवाट कशी लावायची, असा प्रश्न रुग्णालय व्यवस्थापनासमोर उभा राहिला आहे.
लसीकरणाची मागणी
खेड : तालुक्यातील वेरळ जांबुर्डे गावातील रहिवाशांना कोरोना प्रतिबंधात्मक लस अत्यल्प प्रमाणात देण्यात येत आहे. पुरेशी लस मिळावी, अशी मागणी ग्रुप ग्रामपंचायत, वेरळ जांबुर्डेतर्फे प्रशासन व संबंधित यंत्रणेकडे निवेदनाद्वारे करण्यात आली आहे. ४०० लस उपलब्ध करुन द्याव्यात, अशी मागणी करण्यात आली आहे.
कोरोनाचे सात हॉटस्पाॅट
चिपळूण : तालुक्यात कोरोना रुग्णांची संख्या अजूनही कमी होताना दिसत नाही. तालुक्यात सात ठिकाणी हॉटस्पॉट जाहीर करण्यात आले असून, त्याठिकाणी वैद्यकीय यंत्रणा कार्यरत ठेवण्यात आली आहे. दररोज रुग्ण आढळत असल्याने पॉझिटिव्हिटी दर ८ टक्क्यांच्या वर आहे.