लोकमत न्यूज नेटवर्क
खेड : ऐतिहासिक वारसा असलेल्या जगबुडी नदीकडे पर्यटकांना आकर्षून घेण्याची क्षमता आहे. या नदीपात्रात गेली कित्येक वर्षे मगरींचे वास्तव्य असल्याने येथे पर्यटक मोठ्या संख्येने येऊ शकतात. मात्र त्यासाठी या परिसरातील अनधिकृत बांधकामे, अतिक्रमणे, अस्वच्छता या प्रमुख समस्यांबाबत प्रशासनाला काटेकोरपणे काम करावे लागणार आहे. जर या गोष्टी सांभाळल्या गेल्या तर जगबुडी नदी ही खेड शहराला पर्यटनाच्या नकाशावर घेऊन जाईलच, शिवाय रोजगाराचे नवे पर्याय स्थानिकांसाठी उपलब्ध होऊ शकतील.
मुंबई गोवा महामार्गाला खेटून असणाऱ्या खेड शहराला ऐतिहासिक पार्श्वभूमी आहे. सह्याद्री पर्वताच्या उत्तुंग रांगा, गड-किल्ले व बारमाही वाहणारी जगबुडी नदी तालुक्याचे वेगळेपण आहे. जगबुडी नदी किनाऱ्यावर वसलेल्या खेड शहरात एके काळी मोठे बंदर होते. या बंदरातून देशी परदेशी मोठमोठ्या गलबतातून व्यापार चालत असे. मात्र काळाच्या ओघात बंदर वाहतूक बंद झाली तरी याचा ऐतिहासिक खुणा आजही बंदर परिसरात दिसून येतात.
राज्याचे माजी पर्यावरण मंत्री रामदास कदम यांनी जगबुडी नदी किनारा व बंदर परिसराला गतवैभव मिळवून देण्यासाठी क्रोकोडईल पार्क प्रकल्प राबवण्यासाठी गेली पाच वर्षे प्रयत्न केले होते. मुंबई गोवा राष्ट्रीय महामार्ग, कोकण रेल्वेस्थानक यापासून जवळच हा भाग आहे. जगबुडी नदीपात्रात गेले कित्येक वर्षांपासून गाळ साचलेला असल्याने येथील नदीपात्र भोस्ते व देवणे परिसरातील किनारी भागात मगरींचा अधिवास निर्माण झाला आहे. नैसर्गिक सौंदर्य व मोक्याचे ठिकाण असल्याने या परिसराला सजवण्यासाठी दापोली मतदारसंघाचे आमदार योगेश कदम व नगरपरिषद प्रशासनाने गेल्या काही वर्षांपासून प्रयत्न सुरू केले आहेत. परंतु जगबुडी किनाऱ्यावरील शहराच्या दर्शनी भागात असलेल्या अतिक्रमण, अनधिकृत बांधकाम, अस्वच्छता या प्रमुख समस्या ते कसे सोडवणार आहेत हे आगामी कालावधीत पाहावे लागेल.
एका बाजूला लोकप्रतिनिधी शहराच्या सौंदर्यवर्धनासाठी लाखो करोडो रुपयांचे प्रकल्प प्रस्तावित करत आहेत तर दुसरीकडे या स्वप्नांचा चुराडा करणाऱ्यांना प्रशासन अभय देत असल्याचे विदारक चित्र आहे. खेड शहराचा पर्यटन दृष्टीने विकास करायचा असल्यास जगबुडी नदी किनाऱ्याचा दर्शनी भाग नक्कीच मोठी संधी उपलब्ध करून देणारा आहे. मात्र हे सत्यात उतरवण्यासाठी कागदावरच्या नियोजनासोबतच प्रत्यक्ष किनाऱ्यावरील भागात कृतिशील प्रयत्नांची जोड देणे आवश्यक आहे. या भागातील समस्या सोडवून निधीची उपलब्धता करून पर्यटनदृष्टीने विकासात्मक कामे करणे आवश्यक आहे. समुद्र किनाऱ्याची ओढ असलेले पुणे व पश्चिम महाराष्ट्रातील पर्यटक खेड मार्गे दापोली गाठतात. या पर्यटकांना जगबुडी नदीत बोटिंग, मगर दर्शन यासारखे उपक्रम राबविल्यास शहरात पर्यटकांची संख्या निश्चितच वाढेलच त्याचबरोबर आर्थिक उलाढाल वाढण्यास व नवीन उद्योग व्यवसाय करण्याची संधी उपलब्ध होईल यात शंका नाही.
...................
अतिक्रमणे हटवावीत : आमदार कदम
जगबुडी नदीकिनाऱ्यावर शहराच्या दर्शनी भागाचे सौंदर्य वाढवून तेथे बोटिंग व क्रोकोडईल पार्क उभाण्यासाठी राज्य शासनाने नऊ कोटी रुपयांचा निधी मंजूर केला आहे. या प्रकल्पाची अंमलबजावणी करण्यासाठी तेथील अतिक्रमणे व इतर समस्या सोडवाव्यात अशा सूचना मुख्याधिकारी प्रसाद शिंगटे यांना केल्याची माहिती आमदार योगेश कदम यांनी दिली.