रत्नागिरी : जिल्ह्याच्या किनारपट्टीवरील मासेमारी हा प्रमुख व्यवसाय आहे. या व्यवसायावर हजारो कुटुंबांचा उदरनिर्वाह चालत आहे. मात्र, गेल्या काही महिन्यांपासून या व्यवसायाला मंदी आली आहे. त्यातच खलाशांचाही प्रश्न निर्माण झाला आहे. माशांची मरतूक कमी होत असल्याने त्यांची आवक घटल्याने मासे महाग झाले आहेत.
विकासकामांकडे दुर्लक्ष
रत्नागिरी : हजारो लोकवस्ती असलेला राजीवडा गाव हे नगरपरिषदेच्या हद्दीत आहे. गेल्या काही वर्षांपासून या गावातील विकासकामांकडे दुर्लक्ष करण्यात येत असल्याने, लोकांमध्ये नाराजीचा सूर उमटत आहे. या गावात ना रस्ता सुस्थितीत, ना पाण्याचा पुरेसा पुरवठा, त्यामुळे लोकांचे हाल होत असून नगर परिषदेने लक्ष देण्याची मागणी होत आहे.
हॉटेल व्यवसायावर परिणाम
चिपळूण : कोरोना प्रादुर्भावामुळे प्रशासनाने कडक पावले उचलली आहेत. त्यासाठी प्रशासनाने रात्री १० ते सकाळी ५ वाजेपर्यंत लॉकडाऊन जाहीर केला आहे. त्यामुळे रात्री १० नंतर सर्वत्र सामसूम होते, तसेच ग्राहकांची वर्दळ कमी होत असल्याने हॉटेल, धाबे वेळेवरच बंद करण्यात येत आहेत. रात्री १० नंतर ग्राहकही पाठ फिरवत असल्याने त्याचा परिणाम या व्यवसायावर होत आहे.
रस्ता रुंदीकरण कधी होणार ?
चिपळूण : गुहागर-विजापूर रस्ता रुंदीकरणाचे काम सुरू झाले असून, रस्त्यात येणारी झाडे, छोट्या व्यापाऱ्यांच्या टपऱ्या, वाडीतील अंतर्गत रस्ते उद्ध्वस्त होत आहेत. या रस्ता रुंदीकरणात रस्त्यांची उंची व रस्त्यांची पातळी नीट ठेवून रस्ता रुंदीकरणाचे काम करावे, अशी मागणी करण्यात आली आहे
गुहागरमध्ये अधिकाऱ्यांची कमतरता
गुहागर : तालुक्यातील ग्रामीण भागातील शेतकरी पशुसंवर्धन करत आहेत. मात्र, जनावरे आजारी पडल्यास त्यांच्यावर उपचार करण्यासाठी पशुवैद्यकीय अधिकारी उपलब्ध होत नाहीत. तालुक्यात अधिकाऱ्यांची कमतरता असताना, असलेले अधिकारी लक्ष देत नसल्याची शेतकऱ्यांकडून तीव्र नाराजी व्यक्ती केली जात आहे.
गटाराचे काम निकृष्ट असल्याचा आरोप
खेड : तालुक्यातील प्रतिष्ठित समजल्या जाणाऱ्या मुंबई-गोवा महामार्गावरील भरणे ग्रामपंचायत कार्यालयाच्या आवारातील सुलभ शौचालय व रस्त्यापर्यंत गटाराचे बांधकाम निकृष्ट केल्याचा आरोप सामाजिक कार्यकर्ते व माजी तंटामुक्त समिती अध्यक्ष संजय मोडसिंग यांनी मुख्य कार्यकारी अधिकाऱ्यांना दिलेल्या निवेदनात केला आहे.