रत्नागिरी : ओव्हरटेक करताना डंपरने दुचाकीला पाठीमागून धडक दिल्याची घटना तालुक्यातील जयगड येथील जेएसडब्ल्यू एनर्जी कंपनीच्या गेटसमोर दि. २६ मे राेजी रात्री ८.१५ वाजता घडली़ होती. या अपघातात दाेघेजण जखमी झाले असून, याप्रकरणी डंपर चालकाविरोधात जयगड पोलीस स्थानकात गुन्हा दाखल करण्यात आला आहे.
या अपघातप्रकरणी जयगड पाेलिसांनी टोपू बद्धदू चव्हाण (३०, रा. विजापूर, कर्नाटक) या डंपर चालकाविराेधात गुन्हा दाखल केला आहे. या अपघातात दुचाकीवरील गिरीष सुधाकर भाटकर (३८), प्रथमेश चिंतामणी मयेकर (४४, दोघेही रा. मालगुंड) हे जखमी झाले आहेत. बुधवारी रात्री चव्हाण हा डंपर (एमएच ०८, एपी २०३३) घेऊन खंडाळा ते जयगड असा जात होता. त्याने जेएसडब्ल्यू एनर्जी कंपनीच्या गेटसमोर आपल्या पुढील दुचाकीला ओव्हरटेक करताना पाठीमागून धडक देत अपघात केला. अधिक तपास पोलीस हवालदार गावित करत आहेत.