पाचल : भिकाजीराव गुरव यांनी गावच्या विकासकामात फार मोठे योगदान दिलेले आहे. ते कोणालाही कधीही विसरता येणार नाही. त्यांच्या या निधनाने गावाची फार मोठी हानी झालेली आहे. ते अखेरपर्यंत काँग्रेस पक्षाशी एकनिष्ठ राहिले. त्यांच्या कार्यापासून आपण सर्वांनी प्रेरणा घेऊन वाटचाल केली पाहिजे, अशा भावना या शोकसभेत सर्वच व्यक्तींनी व्यक्त केल्या.
राजापूर तालुक्यातील मिळंद गावचे माजी सरपंच व काँग्रेसचे ज्येष्ठ कार्यकर्ते भिकाजीराव गुरव यांचे वृद्धापकाळाने निधन झाले. ग्रामस्थांच्या वतीने त्यांना आत्माराम आयरे विद्यालयात भावपूर्ण श्रद्धांजली अर्पण करण्यात आली. संजीवनी आरोग्य सेवा संस्था व नवसंकल्प युवा मंडळ मिळंद यांच्या वतीने या श्रद्धांजली कार्यक्रमाचे आयोजन करण्यात आले होते. यावेळी अनेकांनी आपल्या भावना व्यक्त केल्या.
या श्रद्धांजली सभेत जामदा खोरे शिक्षण प्रसारक मंडळ मिळंद संस्थेचे अध्यक्ष सुहास आयरे, संजीवनी आरोग्य सेवा संस्थेचे अध्यक्ष शरद मोरे, उपाध्यक्ष गजानन गुरव, पंचायत समिती सदस्य बाजीराव विश्वासराव, आत्माराम आयरे विद्यालयाचे मुख्याध्यापक प्रकाश डोंगरकर, पोलीस पाटील प्रवीण मोरे, पत्रकार सुरेश गुडेकर, मोतीराम मोरे, बाबाजी खानविलकर उपस्थित होते.