राजापूर : भाजपतर्फे तालुक्यात हातिवले येथे आबासाहेब मराठे कॉलेज येथे उभारण्यात आलेल्या कोविड केंअर सेंंटरचा शुभारंभ बुधवारी, ८ सप्टेंबर रोजी ऑनलाइन पद्धतीने केंद्रीय लघू, सूक्ष्म व मध्यम उद्योगमंत्री नारायण राणे व विरोधी पक्षनेते देवेंद्र फडणवीस यांच्या हस्ते होणार आहे. ही माहिती भाजप तालुकाध्यक्ष अभिजित गुरव यांनी दिली.
या कार्यक्रमाला विधान परिषदेचे विरोधी पक्षनेते प्रवीण दरेकर, भाजप प्रदेश सचिव माजी खासदार नीलेश राणे, माजी राज्यमंत्री, आमदार रवींद्र चव्हाण, प्रसाद लाड, आमदार नीतेश राणे, आमदार निरंजन डावखरे, आमदार रमेश पाटील, आमदार भाई गिरकर हे उपस्थित राहणार आहेत. भाजपचे सर्व लोकप्रतिनिधी व अंत्योदय प्रतिष्ठानतर्फे हातिवले येथील आबासाहेब मराठे रुग्णालयात ४० बेटचे हे कोविड केअर सेंटर निर्माण करण्यात आले आहे.
या कार्यक्रमाला सर्व भाजपा पदाधिकारी व कार्यकर्त्यांनी सकाळी ९.३० वाजता हावितले विखारे गोठणे येथील आबासाहेब मराठे कॉलेज येथे उपस्थित राहावे, असे आवाहन अभिजित गुरव यांनी केले आहे.