‘त्या’ बसचा चालक निलंबित

रत्नागिरीतील खेळाडू अपघातग्रस्तांना एस. टी.कडून मदत

रत्नागिरी : शहरात सुरू असलेल्या पश्चिम विभागीय आंतरविद्यापीठ कबड्डी स्पर्धेसाठी रत्नागिरीत आलेल्या अमरावती विद्यापीठाच्या दोन महिला खेळाडूंना भरधाव शहरी बसने धडक दिली. या धडकेने एका महिला खेळाडूचे निधन झाले, तर दुसरी जखमी झाली. अपघातास कारणीभूत चालक प्रमोद मनोहर सावंत यांना रत्नागिरी विभागाने निलंबित केले आहे. शहरी मार्गावर धावणारी आंबेकोंड - रत्नागिरी बस (एमएच २० बीएल ०७५१) जेलनाका उतारातून बसस्थानकाकडे जाताना भरधाव वेगात असल्याने दोन्ही मुलींना धडक दिली. या अपघातामध्ये डोक्याला जबर मार बसलेली पूजा विनायक आगरकर (१९) यवतमाळ ही जागीच ठार झाली. तिची सहखेळाडू प्रियांका प्रकाश काळे (१९) जखमी झाली आहे. परिवहन महामंडळाच्या नियमानुसार अपघातग्रस्तांना तत्कालीक मदत म्हणून मृत पूजाच्या नातेवाईकांना दहा हजार, तर जखमी प्रियांकाला एक हजार रुपयांची मदत दिली आहे. अपघात घडल्यानंतर शासकीय रूग्णालयात मोठा जमाव जमला होता. चालकाला समोर आणा, अशी मागणी या जमावाकडून केली जात होती. या अपघाताला आणि एका युवतीच्या मृत्यूला जबाबदार असलेल्या चालकाचे तत्काळ निलंबन करावे, अशी मागणीही संतप्त जमावाकडून केली जात होती. महामंडळाच्या अधिकाऱ्यांनी त्याचक्षणी कोणताही निर्णय घेतला नाही. मात्र मंगळवारी प्रमोद सावंत यांच्या निलंबनाचे आदेश देण्यात आले आहेत. (प्रतिनिधी)