रत्नागिरी : शहरातील चर्च रोड येथील केळीच्या वखारीजवळील वळणात व्यापारी आणि त्याच्या भावावर हल्ला करून त्यांना लुटण्याचा प्रयत्न मंगळवारी रात्री ९ वाजण्याच्या सुमारास घडला. या प्रकरणी अज्ञाताविरोधात शहर पोलीस स्थानकात गुन्हा दाखल करण्यात आला आहे.
या प्रकरणी रमीज हजीहबीब आकवाणी (३२, रा. मजगाव, रत्नागिरी) यांनी शहर पोलिसांकडे तक्रार दिली आहे. मंगळवारी रात्री जुने भाजी मार्केट येथील किराणा मालाचे दुकान बंद करून ते आपला भाऊ वसीमसोबत दुचाकीने घरी जात होते. चर्च रोड येथे केळीच्या वखारीजवळ एका गतिरोधकावर त्यांनी दुचाकीचा वेग कमी केला असता अज्ञाताने या दोघांवर दांडक्याने हल्ला करून त्यांच्या हातातील पैशांची बॅग हिसकावण्याचा प्रयत्न केला. या हल्ल्यात वसीम यांच्या डोक्याला मार लागल्याने ते गंभीर जखमी झाले आहेत. शहर पोलीस अधिक तपास करीत आहेत.