देवरूख : संगमेश्वर तालुक्यातील कडवई येथील सबारी इंजिनिअरिंग खडी क्रशर प्लांटचे इलेक्ट्रिक साहित्य चोरी प्रकरणातील आरोपीला संगमेश्वर पोलिसांनी उत्तर प्रदेश येथून ताब्यात घेतले आहे. छत्रू सकलदीप यादव (रा. यल्ला पेले निर्मल, अदलाबाद, तेलंगाणा) असे ताब्यात घेतलेल्या चाेरट्याचे नाव आहे. त्याला देवरूख न्यायालयात हजर करण्यात आले असता १५ दिवसांची न्यायालयीन कोठडी सुनावली आहे.
याप्रकरणी प्रवीण नागजीभाई पटेल (रा. आरवली रेल्वे स्टेशनजवळ, ता. संगमेश्वर) यांनी २१ जून रोजी चोरीप्रकरणी फिर्याद दिली होती. मुंबई - गोवा महामार्गावरील कडवई गावी गणपती मंदिराजवळ सबारी इंजिनिअरिंग खडी क्रशर कंपनीचा प्लांट आहे. सबारी कंपनीमधील कंटेनर बॉक्समध्ये बसविलेले १ लाख ९५ हजार रुपये किमतीचे क्रशर प्लांटचे इलेक्ट्रिक साहित्य छत्रू यादव याने २० जून रोजी सायंकाळी ४ वाजता चाेरून नेले हाेते.
छत्रू यादव याने कामाला असताना तेलंगणा येथील पत्ता दिला होता. त्यानुसार संगमेश्वरचे पोलीस निरीक्षक उदय झावरे तपास करीत होते. त्यांच्या मार्गदर्शनाखाली पोलीस उपनिरीक्षक के. जी. कांबळी, पोलीस हेड काॅन्स्टेबल संतोष झापडेकर, प्रशांत मसूरकर, सचिन कामेरकर यांचे पथक फरार आरोपीचा शोध घेण्यासाठी तेलंगणा येथे रवाना झाले होते.
आरोपी छत्रू यादव याला मोबाइल लोकेशनवरून बिजोरा धोबीपुरा (ता. जंगीपूर, जि. गाजीपूर, राज्य उत्तर प्रदेश) येथून २८ रोजी ताब्यात घेतले. १ लाख ९५ हजार रुपये किमतीचे साहित्य पोलिसांनी जप्त करून ताब्यात घेतले आहे. छत्रू यादव याला अटक करून त्याला ३० रोजी देवरूख न्यायालयात हजर करण्यात आले असता, न्यायाधीशांनी तीन दिवसांची पोलीस काेठडी सुनावली होती. ही काेठडी संपताच त्याला पुन्हा न्यायालयात हजर करण्यात आले. त्याला १५ दिवसांची न्यायालयीन कोठडीची शिक्षा सुनावली आहे.