-पहिले लग्न झाल्याचे ठेवले होते लपवून
लोकमत न्यूज नेटवर्क
पुणे : पहिले लग्न झाल्याचे समजल्यावर प्रियकर तरुण व त्याच्या आईवडिलांच्या त्रासाला कंटाळून तरुणीने ओढणीने गळफास घेऊन आत्महत्या केली. याप्रकरणी हडपसर पोलिसांनी प्रियकराला अटक केली आहे.
नितीन दत्तात्रय कांबळे (वय २३, रा. पानमळा, वडकी, ता. हवेली) असे अटक केलेल्या प्रियकराचे नाव आहे. त्याच्या आईवडिलांविरुद्ध गुन्हा दाखल केला आहे.
मनीषा गोविंद गायकवाड (वय २२, रा. फुरसुंगी) असे आत्महत्या केलेल्या तरुणीचे नाव आहे. याप्रकरणी तिच्या वडिलांनी हडपसर पोलिसांकडे फिर्याद दिली आहे. ही घटना फुरसुंगीमध्ये १७ ऑगस्टला सकाळी घडली होती.
याबाबत पोलिसांनी दिलेल्या माहितीनुसार, मनीषा गायकवाड आणि नितीन कांबळे यांचे प्रेमसंबंध होते. त्याची नितीन कांबळे याच्या आईवडिलांना माहिती होती. असे असताना त्यांनी त्याबाबत कधीही फिर्यादी यांना कळविले नाही. नितीन कांबळे याचे यापूर्वी लग्न झाले आहे, हे मनीषा हिला समजल्याने तिला मोठा धक्का बसला. त्याबाबत तिने नितीन कांबळे याला मेसेज करून विचारणा केल्यावर त्याने तिला त्रास देण्यास सुरुवात केली. त्या त्रासाला कंटाळून मनीषा हिने १७ ऑगस्ट रोजी एक चिठ्ठी लिहून घरातील पत्र्याच्या अँगलला ओढणीने गळफास घेऊन आत्महत्या केली. पोलिसांनी अकस्मात मृत्यू अशी नोंद केली होती. या तपासात मनीषाने लिहिलेली चिठ्ठी व तिचे मोबाईलवरील मेसेज यावरून नितीन व त्याच्या आईवडिलांच्या त्रासाला कंटाळूनच तिने आत्महत्या केल्याचे निष्पन्न झाल्याने पोलिसांनी आत्महत्येस प्रवृत्त केल्याचा गुन्हा दाखल करून कांबळे याला अटक केली आहे. वरिष्ठ पोलीस निरीक्षक बाळकृष्ण कदम यांच्या मार्गदर्शनाखाली सहायक पोलीस निरीक्षक रत्नदीप गायकवाड तपास करीत आहेत.