पुणे: दुचाकीवर आलेल्या दहा ते बारा जणांच्या टोळक्याने तरुणाला बेदम मारहाण केली. ही घटना कोंढव्यातील टिळेकरनगरमध्ये घडली. याप्रकरणी युवराज देवकाते ऊर्फ वायडी (रा. टिळेकरनगर) आणि कविराज देवकाते ऊर्फ केडी याच्यासह १० जणांविरुद्ध कोंढवा पोलीस ठाण्यात गुन्हा दाखल करण्यात आला आहे.
आदित्य बनसोडे असे जखमी झालेल्या तरुणाचे नाव आहे. त्याचा मित्र रोहित माने (वय २३) यांनी तक्रार दिली आहे. दोन दिवसांपूर्वी रात्री साडेआठच्या सुमारास आदित्य आणि त्याचे मित्र टिळेकरनगरमधील बसस्थानकाजवळ गप्पा मारत बसले असताना दुचाकीवर आलेल्या टोळक्याने आदित्यला शिवीगाळ करून मारहाण केली. मारहाणीत आदित्य गंभीर जखमी झाला असून, त्याच्यावर रुग्णालयात उपचार सुरू आहेत. मारहाणीचे नेमके कारण समजू शकले नाही. आरोपींचा शोध घेतल्यानंतर घटनेचा उलगडा होणार असल्याचे पोलिसांनी सांगितले.
------------------------------------------