लोकमत न्यूज नेटवर्क
पुणे : देवानंद, गुरुदत्त या कलावंतांच्या वावरामुळे स्मरणीय झालेला गोपाळ कृष्ण गोखले चौक (फग्युर्सन रस्ता) आता कलात्रयीचे नवे रूप घेऊन पुणेकरांसमोर आला आहे. चित्र, नृत्य आणि चित्रण असा कलासंगम आणि समोरच सादरीकरणासाठी एक सुरेख कलाकट्टा या समूह शिल्पाने हा चौक आता सजला आहे.
गोखले चौकातून जाणारी प्रत्येक व्यक्ती क्षणभर तरी इथे थांबायलाच हवी या संकल्पनेतून या चौकातील समूहशिल्प तयार करण्यात आले. कलावंत, ‘गुडलक’चा निवांतपणा, फर्ग्युसन रस्त्यावरची तरुणाईची गर्दी, मोकळा परिसर, जुन्याजाणत्यांच्या आठवणी ही वैशिष्ट्ये लक्षात ठेवून येथील कलासंगम तयार करण्यात आला आहे.
कोणीही क्षणभर तरी थबकून पाहावेच अशी ही कल्पना शंकर गोजारे यांची. त्याला मूर्त रूप दिले बनारस विश्वहिंदू विद्यालयाचे सुवर्णपदक विजेते असलेले व गेली अनेक वर्षे पुण्यात स्थायिक झालेले प्रभाकर सिंग यांंनी. एकसारख्या लोखंडी पट्ट्यांच्या सुबक, सुरेख जोडणीतून ही नृत्य, चित्र, चित्रण त्रयी साकारली. हे एक वेगळेच माध्यम असून, प्रभाकर स्वतःच त्याचे संशोधक आहेत. चित्रकाराच्या कुडत्यावरच्या रेषाही स्पष्ट दिसाव्यात इतकी कलाकुसर त्यांनी यात आणली आहे.
‘या चौकातच एका कडेला कलाकट्टा साकारला. असा कट्टा की त्यावर कोणीही कलाकार आपली कला सादर करील. आता परवाच्या सायंकाळी एका बासरीवाल्याने या कट्ट्यावर बसून बासरीवादन केले. त्याआधी तिथेच बसून एका चित्रकाराने येणाऱ्या-जाणाऱ्यांची चित्रे काढून त्यांना दिली. कोणी गिटार वाजवील तर कोणी सतार. कट्ट्याची रचनाच तशी केली आहे. याचसाठी तर कट्टा आहे,’ असे महापालिकेचे कार्यकारी अभियंता दिनकर गोजारे यांनी सांगितले. त्यांनीच याचे नियोजन केेले.
स्थानिक नगरसेविका ज्योत्स्ना एकबोटे यांनी प्रभाग विकास निधीतून यासाठी अर्थसाह्य केले. कोरोनातल्या टाळेबंदीत हा शिल्पसमूह आवरणाखाली झाकून होता. पाऊसधारांनी त्यावरचे पडदे उतरविले. आता कोरोनाची दुसरी लाटही ओसरली आहे. लवकरच या शिल्प समूहाचे लोकार्पण होत आहे.