लोकमत न्यूज नेटवर्क
पुणे : टेबलावरील कागदपत्र आणि फाईलींचे ढीग कमी करुन कामात सुसूत्रता आणि सलगता आणण्याकरिता पालिकेची कार्यालये ‘पेपरलेस’ केली जाणार आहेत. याची सुरुवात विद्यूत विभागापासून करण्यात आली असून या विभागाच्या आवक-जावक आणि कार्यालयीन कागदपत्र आता ऑनलाईन तपासून ऑनलाईनच ‘क्लिअर’ केली जात आहेत. त्यावरील आवश्यक स्वाक्षरीही अधिकारी मोबाईल अथवा संगणकावरुन व्हर्चुअली करीत आहेत. यापुढे फाईलींचा प्रवासही ऑनलाईनच होणार असल्याचे विद्यूतचे मुख्य अभियंता श्रीनिवास कंदूल यांनी सांगितले.
पालिकेच्या संकेतस्थळाच्या डोमेनमध्ये विविध विभागांचे स्वतंत्र आयपी तयार करण्यात आले आहेत. विद्यूत विभागाला स्वतंत्र लॉग-इन दिले आहे. विद्यूत विभागाकडे येणारी पत्रे, टपाल आदी कागदपत्रे स्कॅन करुन या आयपीवर टाकली जातात. ही कागदपत्रे वरिष्ठ अधिकाऱ्यांकडे फॉरवर्ड होतात. आवश्यक कागदपत्रांची मान्यता, स्वाक्षरी ऑनलाईन केली जाते. अधिकारी कार्यालयातील संगणकावर अथवा मोबाईलवरही लॉग-ईन करुन काम करु शकणार आहेत.
कार्यालयीन कामकाजाच्या तसेच ठेकेदार, बिले आदींच्या फाईल ऑनलाईन आणल्या जाणार आहेत. फाईलींचा प्रवास कोणत्या टेबलवरुन कुठे होतो आहे? कोणत्या टेबलावर संबंधित फाईल किती दिवस पडून आहे? याचीही माहिती समजणार आहे. त्यामुळे कामात सुसूत्रता येणार आहे. भ्रष्टाचारालाही पायाबंद बसण्यास मदत मिळणार आहे.
===
‘पेपरलेस’ कार्यालयामुळे पर्यावरणपूरक व भ्रष्टाचाराला पायाबंद घालण्यासाठी या पद्धतीचा उपयोग होईल. पालिकेचे सर्व विभाग पेपरलेस करण्याचा प्रयत्न आहे.
- श्रीनिवास कंदूल, मुख्य अभियंता, विद्यूत विभाग