पुणे : पावसाळयात गटारे, नाले तुंबून शहरात पाणी साचू नये म्हणून पुणे महापालिकेकडून करण्यात येणारी पावसाळा पूर्व कामे खूपच संथगतीने चालली आहेत. पावसाळा अवघ्या काही दिवसांवर येवून ठेपलेला असताना अनेक नाले, पावसाळी गटारे अद्यापपर्यंत साफ करण्यात आलेली नाहीत. त्यात साठलेला कचरा पाहता यंदाच्या पावसाळयात पुणे पाण्याखाली जाईल, याची भिती वाढली आहे. पावसाळयात शहरात दररोज पडणार्या पावसाच्या पाण्याचा निचरा करण्यासाठी शहरात पावसाळी गटारे आहेत. मात्र वर्षभर त्यात कचरा पडल्याने पावसाचे पाणी त्यात तुंबून रस्त्यावर येते. त्यामुळे पालिकेकडून पावसाळा सुरू होण्याअगोदर पावसाळी पूर्व कामे हाती घेण्यात येतात. यामध्ये पावसाळी गटारे साफ करणे, नाल्यांमधील कचरा काढून ते वाहते करणे या गोष्टी आहेत. याचबरोबर जोरदार पाऊस आणि वार्यांमुळे जी झाडे किंवा फांद्या पडू शकतात, त्याचा सर्वे करून त्या छाटणे ही कामे केली जातात. पुण्यात मॉन्सून येण्यास आता फक्त १७ दिवस शिल्लक राहिले आहेत. मॉन्सून अगोदरचा वळवाचा पाऊस सुरूही झाला आहे. अशात पालिकेने युध्दपातळीवर ही कामे हाती घेण्याची गरज असताना प्रत्यक्षात शहरात ही कामे खूपच स्लो पध्दतीने सुरू आहेत. यामुळे चार दिवसांपूर्वी शहरात झालेल्या मुसळधार पावसामुळे अनेक रस्ते पाण्याखाली गेल्याचे, झाडे पडल्याच्या घटना घडल्या होत्या. यानंतरही पालिका प्रशासन जागे होईल, असे चित्र होते. मात्र प्रत्यक्षात शहरात ही कामे वेगाने करण्यात येत नसल्याचे चित्र आहे. अंबील ओढा, एरडंवण्यातून नदीपात्रात सोडण्यात आलेला नाला, डेक्कन येथील नाला आदींमध्ये कचर्याचे आणि राडारोडयाचे साम्राज्य पसरले आहे. त्यामुळे पावसाळयात पाणी तुंबण्याची शक्यता वाढली आहे. पाणी तुंबले की शहरातील पावसाळी गटारे तंबून रस्त्यांवर पाणी येण्याची शक्यता आहे. गेल्यावर्षी नालेसफाई करण्यात न आल्याने शहरातील अनेक रस्ते पाऊस पडताच पाण्याखाली गेले होते. त्यामुळे यंदातरी नालेसफाई केली जाईल, असे वाटत होते. मात्र प्रत्यक्षात असे काहीच झालेले नाही. काही ठिकाणी पावसाळी गटारांमधून काढलेली घाण तेथेच टाकण्यात येत आहे. ती पुन्हा त्यातच पडत असल्याचे चित्र आहे. (प्रतिनिधी)
पुणे जाणार ‘पाण्यात’?
By admin | Updated: May 20, 2014 23:58 IST