ग्रामस्थांनी टोलवसुली केली बंद

पुणे-नाशिक महामार्गावर चाळकवाडी येथील टोलनाक्यावर शनिवारी (दि. ११) मध्यरात्री बारा वाजल्यापासून पथकर आकारणी सुरू करण्यात येणार होती...

पिंपळवंडी : पुणे-नाशिक महामार्गावर चाळकवाडी येथील टोलनाक्यावर शनिवारी (दि. ११) मध्यरात्री बारा वाजल्यापासून पथकर आकारणी सुरू करण्यात येणार होती, संतप्त ग्रामस्थांनी टोलनाक्यावरील वसुलीचे काम बंद पाडले.राजगुरुनगर ते सिन्नर यादरम्यान चौपदरी रस्त्यावर काम करण्यात आले असून या महामार्गावर जुन्नर तालुक्यात चाळकवाडी आणि संगमनेर तालुक्यात हिवरगाव पावसाळ्यात या ठिकाणी टोलनाके उभारण्यात आले आहेत. भारतीय राजमार्ग प्राधिकरणाच्या करारपत्रकानुसार दि. ३१ जानेवारी रोजी १०४.६३६ किलोमीटर लांबीचा रस्ता पूर्ण झाला असल्याबाबतचे पत्र संबंधित यंत्रणेकडून मिळाले असल्यामुळे व्यावसायिक वापरासाठी रस्ते परिवहन व महामार्ग मंत्रालयाने पथकर वसुली करण्यास मान्यता दिली आहे. याबाबतची जाहीर सूचना प्रसिद्ध केल्यानंतर शनिवारी मध्यरात्री बारा वाजल्यापासून पथकर वसुलीसाठी सुरुवात करण्यात येणार होती. परंतु अद्याप आळेफाटा बाह्यवळण रस्ता, सद्गुरुनगर व पिंपळवंडी बसस्टँड येथील उड्डाणपूल, आळे येथील ग्रामपंचायतीच्या पाण्याच्या पाइपलाइन दुरुस्ती अशी अनेक कामे अपूर्णावस्थेत आहेत. तसेच ज्या शेतकऱ्यांच्या जमिनी व घरे गेली आहेत, त्यांना अद्याप नुकसानभरपाई मिळाली नाही. महामार्गाचे काम अत्यंत निकृष्ट दर्जाचे करण्यात आले आहे. स्थानिकांनी पथकर आकारण्यात येऊ नये, टोलनाक्यावर स्थानिक तरुणांना नोकरी देण्यात यावी आदी मागण्या करीत शनिवारी रात्री दहा वाजण्याच्या सुमारास त्या ठिकाणी जाऊन पथकर वसुली करण्यास हरकत घेतली. टोलनाक्याच्या सजावटीसाठी लावलेले फुगे व हार तोडण्यात आल. याबाबतची माहिती मिळाल्यानंतर आळेफाटा पोलिसांनी मध्यस्थी करीत नागरिकांना शांत केले. याबाबत भारतीय राजमार्ग प्राधिकरणाच्या अधिकाऱ्यांबरोबर माहिती देण्यास असमर्थता दर्शविली. (वार्ताहर)