लोकमत न्यूज नेटवर्क
पुणे : पंतप्रधान नरेंद्र मोदींनी राजकारण्यांनी लसीकरण करून घेण्याची गडबड करू नये, तसेच आपल्या पदाचा फायदा घेऊ नये हे स्पष्ट केलेले असतानाच शासनाचा आदेश डावलून थेट पंचायत समितीच्या सभापतींनीच लसीकरण करून घेण्याचा प्रकार पुण्यात उघडकीला आला आहे. महत्त्वाचे म्हणजे यांनी चक्क नोंदणी करून ही लस मिळवली आहे.
वेल्हा पंचायत समितीचे सभापती आणि काँग्रेस नेते दिनकर सरपाले यांनी हे लसीकरण करून घेतले आहे. पंचायत समितीमधील सर्व फ्रंटलाइन वर्कर्सचे लसीकरण संपल्याने आपल्यासह आणखी चारपाच जणांचे लसीकरण करण्यात आल्याचा दावा त्यांनी केला आहे.
सरकारने आरोग्य कर्मचाऱ्यांशिवाय कोणालाही लस देण्यास मनाई केली असताना सभापतींना लस मिळाली कशी ? असा सवाल आता विचारला जातो आहे. याप्रकरणी आता जिल्हा आरोग्य अधिकाऱ्यांकडून संबंधितांना कारणे दाखवा नोटीस बजावण्यात आली आहे. गंमत म्हणजे आरोग्य कर्मचाऱ्यांचे लसीकरण होण्यापूर्वीच वेल्ह्यातल्या पंचायत समितीच्या सभापतींनी आपले लसीकरण करून घेतले आहे. महत्त्वाचे म्हणजे या लसीकरणाचे त्यांनी फोटोसेशनही करून घेतले आहे. याबाबत सरपाले म्हणाले, “आठ दिवसांपूर्वी पंचायत समितीमध्ये माझ्याकडून कागदपत्रे मागवण्यात आली होती. त्यानंतर मला एसएमएस आला आणि मग माझे लसीकरण करण्यात आले. मी एकट्याने नाही तर माझ्यासह आणखी तीन-चार जणांचेही लसीकरण झाले आहे.”
पण ही लस मिळाली कशी, हे विचारले असता सरपाले म्हणाले, “आमच्या इथे आरोग्य कर्मचाऱ्यांचे लसीकरण संपले होते. त्यामुळे आमचे लसीकरण करण्यात आले. रितसर नोंदणी करून हे लसीकरण केले आहे. मी सभापती असल्याने हे लसीकरण करण्यात आले आहे. दरम्यान, या प्रकरणी चौकशी करण्यात येईल, असे जिल्हाधिकारी डाॅ. राजेश देशमुख यांनी स्पष्ट केले.
-------------
फोटो : वेल्हा पंचायत समितीत कोरोना लस घेताना वेल्हा पंचायत समिती सभापती दिनकर सरपाले व त्यांचे कार्यकर्ते.