पुणे : ‘डिसेंबरपर्यंत लसीकरण पूर्ण होईल’, अशा थापा राजकारणी मारत आहेत. महिन्याला १५ कोटी डोसचे उत्पादन करणे ही सोपी गोष्ट नाही. उत्पादन १५ कोटींपर्यंत नेण्याचा आमचा प्रयत्न आहे. दर वर्षी ११०-१२० कोटी डोस देण्याचे आश्वासन आम्ही दिले आहे. इतर कंपन्यांच्या लसींचे उत्पादनही सुरू आहे. या सगळ्यांची आकडेमोड करून किती डोस उपलब्ध होऊ शकतात, हे मोजता येऊ शकेल, अशा शब्दांत सिरम इन्स्टिट्यूट आॅफ इंडियाचे संचालक डॉ. सायरस पूनावाला यांनी मोदी सरकारवर निशाणा साधला.
पुण्यातील एका कार्यक्रमानंतर डॉ. पूनावाला यांनी पत्रकारांशी संवाद साधला. सिरम इन्स्टिट्यूटतर्फे इतर सर्व लसींचे मिळून १० कोटींचे उत्पादन होत आहे. दुसरीकडे, केवळ कोविशिल्डच्या १० कोटी लसींचे उत्पादन एका महिन्यात केले जात आहे. नागरिकांना लवकरात लवकर लस मिळावी, यासाठी आम्ही कोरोनावरील लसीला प्राधान्य देत आहोत, याकडे त्यांनी लक्ष वेधले. अदर पूनावाला केवळ उन्हाळी सुट्ट्यांसाठी परदेशी गेले होते. धमक्या आल्यामुळे देश सोडावा लागला, असा विपर्यास केला, असेही पूनावाला यांनी नमूद केले.
पूनावाला म्हणाले, ‘मोदी सरकारने लसीच्या निर्यातीवर बंदी आणून अतिशय वाईट निर्णय घेतला आहे. मुलाने सांगितले होते की, यावर भाष्य करू नका, पण मी बोलणार आहे. सीरम जगातील १७० देशांना लसींचा पुरवठा करत आहे. त्या देशांनी आता कोरोनावरील लसीचीही मागणी केली आहे. त्यांनी कोट्यवधी रुपये आधीच दिले आहेत. बिल गेटस फाउंडेशनने पाच हजार कोटी रुपये दिले. मी त्यांना पैैसे परत देण्याची तयारी दाखवली, पण त्यांनी नकार दिला. एक-दोन महिन्यांमध्ये सरकारने निर्यातीला परवानगी दिल्यावर आम्हाला लस द्या, असे त्यांनी सांगितले आहे.’
-----------
तिसरा डोस घ्यावा लागेल
कोविशिल्ड लस घेतल्यावर निर्माण झालेल्या अँटिबॉडी सहा महिन्यांनी कमी होऊ लागतात. म्हणून मी तिसरा डोस घेतला आहे. लसीच्या दोन डोसमधील अंतर दोन महिने असले पाहिजे. मात्र, लस उपलब्ध नसल्यामुळे मोदी सरकारने तीन महिन्यांच्या अंतराचा फतवा काढला आहे. कोरोना होऊन गेलेल्यांनी सहा महिन्यांनी लस घ्यावी, असे सायरस पूनावाला म्हणाले.
------------------------------------
लॉकडाऊनची गरज नाही
लॉकडाऊनची गरज आहे, असे मला वाटत नाही. हर्ड इम्यनिटीमुळे लोकांना संरक्षण मिळू शकेल. कोरोनाचा मृत्यूदरही कमी आहे.
-----------
कॉकटेल डोस परिणामकारक नाही
कॉकटेल लसीला माझा विरोध आहे. दोन वेगवेगळ्या लसींचे डोस दिले आणि परिणामकारकता चांगली नसल्यास लस उत्पादक कंपन्या एकमेकांवर आरोप करतील. चाचण्यांमध्ये कॉकटेलची उपयुक्तता सिद्ध झालेली नाही.
-------------------------
कोरोनाच्या साथीचा परिणाम लक्षात घेऊन शाळा सुरू करण्याबाबतचा निर्णय घ्यावा. सध्या शाळा आॅनलाईन सुरू आहेत, मुले घरी अभ्यास करू शकतात. शरद पवार साहेबांना विचारा की, मी कॉलेजच्या कँटिनमध्ये बसायचो, वर्गात जात नव्हतो. तरी सिरम इन्स्टिट्यूट उभे केले, अशी मिश्किल टिपण्णी त्यांनी केली.
--------------
तिस-या लाटेची तीव्रता कमी
हर्ड इम्युुनिटी आणि लसीकरणाच्या माध्यमातूनच साथीवर नियंत्रण मिळवता येईल. कोरोनाची साथ जोपर्यंत जाणार नाही, तोवर लस घ्यावी लागणार आहे. तिसरी लाट तितकीशी तीव्र नसेल, कारण अनेकांना कोरोना होऊन गेला आणि अनेकांचे लसीकरणही झाले आहे.