शिरूरमध्ये सुरू होणार ऑक्सिजनचे दोन प्रकल्प

शिरुर-हवेलीत कोरोनाबाधितांची संख्या वाढत आहे. दररोज सुमारे ३०० पेक्षाही जास्त ऑक्सिजन सिलिंडरची गरज पूर्ण कशी करायची? या विवंचनेत लोकप्रतिनिधी व प्रशासन होते. यावर तातडीचा पर्याय म्हणून सणसवाडी (ता. शिरूर) येथील चिन्मय ऑक्सिजन प्रायव्हेट लिमिटेड हा लिक्विड ऑक्सिजन सिलेंडरचा रिफिलिंग प्लॅट तसेच रांजणगाव औद्योगिक वसाहतीतील ऑक्सी-एअर (Oxy-Air) नॅचरल रिसोर्सेस हा हवेतून ऑक्सिजन निर्मिती करणाऱ्या प्लॅटला प्रशासनाच्या मदतीने तातडीने वीजपुरवठा तसेच उत्पादन लवकर सुरु करण्यासाठी शिरुर-हवेलीचे आमदार ॲड. अशोक पवार यांच्या प्रयत्नांना अखेर यश आले आहे. सणसवाडी (ता. शिरूर) येथील चिन्मय ऑक्सिजन या लिक्विड ऑक्सिजन सिलेंडर रिफिलिंग करणारा प्लॅट, ऑक्सिजन टँकरचा पुरवठ्याअभावी बंद होता. त्यासाठी स्थानिक लोकप्रतिनिधी व पदाधिकारी यांच्या मागणीनुसार आमदार अशोक पवार हे प्रांताधिकारी संतोषकुमार देशमुख तसेच अन्न व औषध प्रशासन आयुक्त एस. बी. पाटील यांच्याकडे पाठपुरावा करीत होते. अखेर आयुक्त एस. बी. पाटील यांनी या प्लँटला नव्याने परवानगी देत पाच टन लिक्विड ऑक्सिजनचा पुरवठा करण्यास मान्यता दिली असून, आज पुरवठा झाल्यास उद्या या प्लॅटमधून शिरुर-हवेलीतील ३२ रुग्णालयांचा किमान २५० ऑक्सिजन सिलेंडरचा पुरवठा सुरळीत होऊन रुग्णालये तसेच रुग्णांना दिलासा मिळणार आहे.

रांजणगाव औद्योगिक वसाहतीतील ऑक्सी-एअर नॅचरल रिसोर्सेस हा हवेतून ऑक्सिजन निर्मिती करणारा प्लँटही आठवडाभराच्या आतच सुरु होणार असून प्रतिदिन सुमारे ८ टन क्षमतेच्या या प्लँटमुळे शिरुर-हवेलीतील जवळपास सर्वच रुग्णालयांचा ऑक्सिजन पुरवठा सुरळीत होऊ शकणार असून भेदभाव न करता इतरांनाही ऑक्सिजनची मदत करणे शक्य होणार असल्याचे आमदार ॲड. अशोक पवार यांनी सांगितले.

ऑक्सिजनअभावी कोणत्याही रुग्णाचा जीव जाऊ नये, यासाठी सणसवाडी तसेच रांजणगाव औद्योगिक वसाहतीतील ऑक्सिजन प्लँटसाठी केलेल्या प्रशासकीय पाठपुराव्याला यश येऊन सणसवाडीच्या प्लँटमधून उद्यापर्यंत तर रांजणगाव वसाहतीच्या प्लँटमधून चार-पाच दिवसांत उत्पादन प्रक्रिया सुरु होईल. जेणेकरून पुढे ऑक्सिजन पुरवठा सुरळीत होईल.

दरम्यान, प्राथमिक स्तरावरील रुग्णांना ऑक्सिजनसाठी उपयोगी असलेले ऑक्सिजन कॉन्सन्ट्रेटर मशिनही मतदारसंघातील महत्त्वाच्या कोविड रुग्णालयांना देण्यात आले आहे. विमानातील आपत्कालीन ऑक्सिजन यंत्रणा तसेच साखर कारखान्यात ऑक्सिजन निर्मिती प्रकल्पाबाबतही उपमुख्यमंत्री अजित पवार यांच्याकडे चाचपणी व पाठपुरावा सुरु आहे.

ॲड. अशोक पवार, आमदार, शिरुर-हवेली

सध्या शिरुरमधील रुग्णालयांकडून ऑक्सिजनची मागणी दररोज वाढत असून पुरेशा पुरवठ्याचा प्रशासनाचा प्रयत्न आहे. सणसवाडी व रांजणगावचे नवे ऑक्सिजन प्लँट पूर्ण क्षमतेने चालल्यास नियमित पुरवठा होऊन कोणताही रुग्ण ऑक्सिजनअभावी दगावणार नाही.

संतोषकुमार देशमुख, प्रांताधिक़ारी, शिरूर, पुणे.