पुणे : ग्रामीण भागातून ट्रक चोरणा-या चोरट्यांना ग्रामीण पोलिसांच्या गुन्हे शाखेने अटक केली. त्यांच्याकडून वीस लाख रुपये किमतीचे दोन ट्रक जप्त करण्यात आले.
पैगंबर सिंकदर शेख (वय ३१, रा. मिरज, तासगाव फाटा, जि. सांगली) आणि अशोक बबन निळे (वय ३०, रा. वसपेठ, ता. जत, जि. सांगली) अशी अटक करण्यात आलेल्यांची नावे आहेत. ग्रामीण भागातून चोरलेले ट्रक विक्रीसाठी घेऊन दोघेजण भिगवण परिसरात येणार असल्याची माहिती ग्रामीण पोलिसांच्या स्थानिक गुन्हे अन्वेषण शाखेला मिळाली. पोलिसांनी भिगवण परिसरात नाकाबंदी करून तपासणी सुरू केली. नाकाबंदीत ट्रकचालक शेख आणि निळे यांना ताब्यात घेण्यात आले. चौकशीत शेख आणि निळे यांना कर्नाटकातून ट्रक चोरल्याची कबुली दिली. निळे याच्याकडे दहा चाकी अवजड ट्रक असून, तो बनावट क्रमांकाचा वापर करून ट्रक चालवित असल्याची माहिती मिळाली. निळेने दहा चाकी ट्रक सोलापूर भागातील एकाकडून ट्रक आणल्याचे तपासात निष्पन्न झाले आहे. पोलीस अधीक्षक डॉ. अभिनव देशमुख, अतिरिक्त अधीक्षक मिलिंद मोहिते, उपविभागीय अधिकारी नारायण शिरगावकर यांच्या मार्गदर्शनाखाली गुन्हे शाखेचे पोलीस निरीक्षक पद्माकर घनवट, भिगवण पोलीस ठाण्याचे निरीक्षक जीवन माने, शिवाजी ननावरे, विजय कांचन, विजय करे, अमोल शेंडगे, मंगेश भगत आदींनी ही कारवाई केली.
---