पुणे : कोरोना प्रतिबंधात्मक लसीकरण मोहीम सुरू झाल्यापासून गुरुवारी (दि.१२) प्रथमच पुणे महापालिकेला सर्वाधिक म्हणजे तब्बल ७४ हजार कोविशिल्ड लस शासनाकडून प्राप्त झाल्या आहेत़ त्यामुळे आज (शुक्रवार दि.१३) शहरातील महापालिकेच्या १८७ लसीकरण केंद्रांवर प्रत्येकी २०० लसीचे डोस वितरीत करण्यात आले आहेत.
लसीकरण अधिकारी डॉ़ सूर्यकांत देवकर यांनी दिलेल्या माहितीनुसार, महापालिकेला गुरुवारी दुपारी शासनाकडून कोविशिल्ड लसीसह ५ हजार कोव्हॅक्सिन लसही मिळाल्या आहेत़ यामुळे आज शहरातील सर्व लसीकरण केंद्र सुरू ठेवण्यात येणार आहे़ तसेच ससूनसह महापालिकेच्या झोननिहाय ७ दवाखान्यात कोव्हॅक्सिन लस उपलब्ध राहणार आहे.
आज लसीच्या उपलब्ध साठ्यापैकी १८ वर्षांवरील नागरिकांना २० टक्के लस ही आॅनलाईन बुकिंगद्वारे, तर २० टक्के लस ही आॅन दी स्पॉट नोंदणी करून पहिला डोस म्हणून मिळणार आहे़ तर कोविशिल्ड लसीच्या उर्वरित साठ्यापैकी ३० टक्के लस ही ८४ दिवस पूर्ण झालेल्यांना (२१ मे पूर्वी लस घेतलेल्यांना) आॅनलाईन बुकिंगद्वारे तर ३० टक्के लस ही आॅन दी स्पॉट नोंदणी करून दुसरा डोस म्हणून मिळणार आहे़ तसेच सेशन संपण्यापूर्वी उघडलेल्या लसीच्या कुपीत लस शिल्लक राहिल्यास आॅन स्पॉट नोंदणी करून उपलब्ध लस नागरिकांना देण्यात यावी, अशा सूचना प्रत्येक लसीकरण केंद्रास देण्यात आल्या आहेत़ लसीकरणाच्या आॅनलाईन बुकिंग करिता सकाळी ८ वाजता स्लॉट ओपन होणार आहे.