चोरट्यांनी केली ट्रकची चाके लंपास

विजयादशमीच्या मुहूर्तावर नवीन आणलेल्या बारा चाकी ट्रकची सहा चाके चोरट्यांनी डिस्कसह चोरून नेली. ही घटना गुरुवारी (दि. १३) घडली.

लोणी काळभोर : विजयादशमीच्या मुहूर्तावर नवीन आणलेल्या बारा चाकी ट्रकची सहा चाके चोरट्यांनी डिस्कसह चोरून नेली. ही घटना गुरुवारी (दि. १३) घडली.याप्रकरणी सिद्धेश्वर नामदेव काळभोर (रा. रामदरा रोड, लोणी काळभोर) यांनी फिर्याद दिली आहे. त्यांचा लहान भाऊ नवनाथ काळभोर यांनी विजयादशमी रोजी एका खासगी वित्त वितरण करणाऱ्या कंपनीकडून नवीन १२ चाकांचा ट्रक व्यवसाय करण्यासाठी आणला होता. हा ट्रक १२ आॅक्टोबर रोजी सायंकाळी ६ वाजण्याच्या सुमारास सतीश हरिश्चंद्र जाधव यांनी लोणी गावातील जिल्हा परिषद प्राथमिक शाळेसमोर असलेल्या मोकळ्या मैदानात लावला व ते घरी गेले.गुरुवारी सकाळी ७.३०च्या सुमारास जाधव ट्रकजवळ आले. त्या वेळी त्यांना ट्रकच्या डाव्या बाजूच्या पुढचा डमी टायर, हाउजिंगचे चार टायर व स्टेपनीचा एक असे एकूण सहा टायर डिस्कसह आढळून आले नाहीत. ट्रकखाली दगड लावण्यात आले होते. जाधव यांनी आजूबाजूला पाहिले परंतु त्यांना टायर आढळून न आलेने त्यांनी सिद्धेश्वर काळभोर यांचेशी संपर्क साधला व टायर चोरीविषयी माहिती दिली. काळभोर तेथे पोहोचल्यानंतर त्यांनीही आपल्या नातेवाइकांसमवेत सर्वत्र शोध घेतला. परंतु टायर मिळून न आलेने त्यांनी लोणी काळभोर पोलीस ठाण्यात ६० हजार रुपये किमतीचे सहा टायर डिस्कसह चोरी झाली असल्याची तक्रार दिली.