वानवडी : वीकेंड लाॅकडाऊनला सुरुवात झाल्याच्या पहिल्या दिवशीच्या मध्यरात्री वानवडीमध्ये अज्ञात चोरट्यांनी दुकान फोडत अत्यावश्यक असणाऱ्या वस्तू चोरून नेल्या आहेत.
शुक्रवारी रात्री दीड-दोनच्या सुमारास वानवडीतील होलेवस्ती येथे असलेल्या मयूर सुपर मार्केट या किराणा मालाच्या दुकानात अज्ञात चोरट्यांनी चोरी करत धान्य, सिगारेट पाकीट, बिस्कीट पुडे, रोख रक्कम तसेच ड्रायफ्रूट चोरले.
चोरटे सीसीटीव्ही कॅमेरात कैद झाले असून, चोरट्यांनी तोंडाला मास्क लावले असल्याने शहानिशा करणे अडचणीचे ठरत आहे. भैरोबानाला पोलीस चौकीत चोरीची घटना झाल्याचे सांगण्यात आले असून सीसीटीव्ही फुटेज देण्यात आले आहेत. सीसीटीव्ही फुटेज वरुन चोरांचा तपास सुरु असल्याचे पोलीस उपनिरीक्षक पोटवडे यांनी सांगितले.
कोरोना काळातील लाॅकडाऊनमुळे अनेकांचे व्यवसाय बंद पडले तर काहींच्या नोकरींवर गदा आली. त्यामुळे चोरीच्या घटना घडत असून पोलिसांकडून गस्त वाढवण्यात यावी, असे मत नागरिक व्यक्त करत आहेत.
दुकानात चोरी होण्याची ही दुसरी वेळ असून पहिल्या वेळेस ५० हजार रोख रक्कम चोरण्यात आली होती, परंतु चोरट्यांना अद्यापही पकडण्यात आले नसल्याचे दुकान मालक चौधरी यांनी सांगितले.