लोकमत न्यूज नेटवर्क
पुणे : झोपडपट्टीधारकांचे पुनर्वसन करण्यासाठी बांधण्यात आलेल्या इमारतीमधील ४३९ फ्लॅटमध्ये शिरून चोरट्यांनी चोरी केल्याचा धक्कादायक प्रकार समोर आला आहे. हडपसर येथील शिंदेवस्तीत हा प्रकार घडला आहे.
याप्रकरणी तहसीलदार विकास भालेराव (वय ४७, रा. फुलेनगर) यांनी हडपसर
पोलीस ठाण्यात फिर्याद दिली आहे.
भालेराव हे तहसीलदार ताबा या पदावर झोपडपट्टी पुनर्वसन प्राधिकरण व पिंपरी-चिंचवडमध्ये कार्यरत आहे. झोपडपट्टी पुनर्वसन प्राधिकरणाने शिंदेवस्ती येथे झोपडपट्टीधारकांचे पुनर्वसन करण्यासाठी ४ इमारती बांधल्या आहेत. त्यापैकी २ इमारतींमध्ये ४१२ घरांत लोक राहायला आले आहेत. उरलेल्या दोन इमारती रिकाम्या असून त्याचे प्रवेशद्वार गेट लावून बंद आहेत. इमारत क्रमांक ए विंगमध्ये २३६ फ्लॅट आहेत. त्यापैकी २१५ फ्लॅट व बी विंगमधील २२४ फ्लॅट
अशा एकूण ४३९ फ्लॅटचा कडीकोयंडा तोडून चोरट्यांनी आत प्रवेश केला. या
घरातील नळ, मिक्सर व शॉवर असे तब्बल १ लाख ९ हजार ७५० रुपयांचा माल चोरून नेला. चोरीचा हा प्रकार ४ जून ते २६ ऑगस्ट २०२१ दरम्यान घडला आहे. सुरक्षारक्षक असतानाही चोरट्यांनी इमारतीच्या पाईपलाईनवरुन चढून लॉबीमध्ये प्रवेश केला व तेथून घरांचे कडीकोयडा तोडून बाथरूममधील फिटिंग्स चोरून नेले. घरातील पंखे व अन्य साहित्यांना मात्र हात लावला नाही.
हडपसर पोलिसांनी चोरीचा गुन्हा दाखल केला असून पोलीस उपनिरीक्षक माने
तपास करीत आहेत़