लोकमत न्यूज नेटवर्क
पुणे : तीन महिन्यांपूर्वी चुलतीला केलेल्या शिव्या दिल्याच्या रागातून एका तरुणाचे कपडे काढून दगडाने मारहाण केल्याचा प्रकार कोंढव्यात घडला. कोंढवा पोलिसांनी दोघांना अटक केली आहे.
शहनवाज शेख (वय २२) आणि सय्यदअली कुरेशी उर्फ गुटर्या (दोघे रा. कोंढवा खुर्द) अशी अटक केलेल्यांची नावे आहेत, तर त्यांचा अन्य एक साथीदार अरबाज शेख अशा तिघांविरुद्ध खुनाचा प्रयत्न केल्याचा गुन्हा दाखल केला आहे.
कोंढवा खुर्द येथील काझी चौकाजवळील सोमजी येथे शनिवारी सायंकाळी ७ वाजता ही घटना घडला. फिर्यादी मोहसीन याने तीन महिन्यांपूर्वी अरबाज शेख याच्या चुलत्याला उसने पैसे मागण्यासाठी फोन केला होता. चुलत्याने फोन न उचलता चुलतीने फोन घेतला. त्यावेळी त्यांच्यात फोनवर पैशांवरून वादावादी झाली. याचा अरबाज याला राग आला होता. अरबाज याने साथीदारांच्या मदतीने मोहसीन याला दगडाने मारहाण केली. त्यात त्याच्या कानाला दुखापत झाली, तसेच अंगावरील कपडे काढून मारहाण केली. त्यात मोहसीन जबर जखमी झाला आहे. पोलिसांनी जीवे मारण्याचा प्रयत्न केल्याचा गुन्हा दाखल करून दोघांना अटक केली आहे. सहायक पोलीस निरीक्षक मधाले तपास करीत आहेत.