मगर तरणतलाव पुन्हा खुला

नेहरुनगर येथील अण्णासाहेब मगर स्टेडिअम तलावाच्या तळ्यातील व कठड्याच्या फरशा फुटल्याने नागरिक व मुले जखमी होण्याचे प्रमाण वाढले होते.

पिंपरी : नेहरुनगर येथील अण्णासाहेब मगर स्टेडिअम तलावाच्या तळ्यातील व कठड्याच्या फरशा फुटल्याने नागरिक व मुले जखमी होण्याचे प्रमाण वाढले होते. चार दिवसांच्या किरकोळ दुरुस्तीनंतर पुन्हा तलाव खुला झाला आहे. मात्र, ऐन उन्हाळ्यात तलावास टाळे असल्याने नागरिकांची मोठी गैरसोय झाली. गेल्या वर्षी तलावाचे मोठ्या प्रमाणात दुरुस्ती काम केले गेले होते. स्थापत्य विभागातर्फे हे काम झाले. मात्र, कामाचा दर्जा सुमार असल्याने अनेक समस्या निर्माण झाले आहेत. तलावाचे तळाचे आणि कठड्याच्या फरशा फुटल्या होत्या. त्याचबरोबर कठड्यावरील झाकण असलेले फरशाही तुटल्या आहेत. यामुळे पोहण्याच्या हात व पायास जखमा होत होत्या. तक्रारीत वाढ झाल्याने तलाव व्यवस्थापकांनी क्रीडा विभागाकडे तक्रार केली. अनेकदा पाठपुरावा केल्यानंतर अखेर गेल्या गुरुवारी किरकोळ दुरस्ती काम करण्यात आले. तळ्यातील तुटलेल्या फरशाच्या जागी सिमेंट लावले आहे. तसेच, कठड्याच्या फरशांची धार कमी करून त्यावर रबर लावण्यात आले आहे. दुरुस्ती काम चार दिवस सुरू होते. त्यामुळे एक साप्ताहिक सुटी व इतर तीन दिवस तलावास टाळे होते. ऐन उन्हाळ्यात तलावाचे बंद असलेले प्रवेशद्वार पाहून नागरिकांना माघारी फिरावे लागले. त्यात अनेकांची गैरसोय झाली. नियमित व पासधारकांनी रोष व्यक्त केला. यामुळे महापालिकेचे दररोजचे उत्पन्नही बुडाले. किरकोळ दुरुस्तीनंतर तलाव खुला झाला असून, पोहण्याचा आनंद नागरिक घेत आहेत. मागील दारातून घुसखोरी तलावाच्या मागील बाजूने असलेले प्रवेशद्वार गंजले आहे. प्रवेश न मिळालेले, तसेच विनातिकीट मुले या फटीतून आतमध्ये प्रवेश करतात. सुरक्षारक्षकांची नजर चूकवून ते सहज प्रवेश मिळवितात. त्यामुळे तलावात १०० पेक्षा अधिक मुले पोहताना दिसतात. ही बाब लक्षात आल्याने तलाव व्यवस्थापकांनी या प्रवेशद्वारास प्लायवूड लावून ते तात्पुरते बंद केले आहे. (प्रतिनिधी)