सणसवाडी येथे घरातील छळाला कंटाळून विवाहितेने घरात गळफास घेऊन आत्महत्या केल्याची घटना घडली. चैत्राली योगेश दरेकर असे आत्महत्या केलेल्या विवाहितेचे नाव असून शिक्रापूर पोलीस स्टेशन येथे विवाहितेच्या पतीसह पाच जणांवर गुन्हे दाखल करण्यात आले आहेत.
योगेश बबुशा दरेकर, कल्पना बबुशा दरेकर, बबुशा विठ्ठल दरेकर, राहुल बबुशा दरेकर, कोमल राहुल दरेकर असे गुन्हे दाखल करण्यात आलेल्या व्यक्तींची नावे आहेत.
सणसवाडी येथील चैत्राली दरेकर या विवाहितेचे २०१६ मध्ये लग्न झाले होते. लग्नानंतर अनेक दिवस मूलबाळ होत नाही म्हणून तिच्या पतीसह सासरच्या लोकांनी तिचा छळ सुरु केला. याबाबत विवाहितेने वेळोवेळी आपल्या माहेरच्या लोकांना माहिती दिली होती. मात्र तरी सासरच्या लोकांकडून होणारा शारीरिक व मानसिक त्रास असह्य झाल्याने चैत्राली हिने राहत्या घरात गळफास घेऊन आत्महत्या केली. याबाबत विवाहितेचा भाऊ प्रशांत देविदास लोखंडे (वय २९, रा. मरकळ, ता. खेड, जि. पुणे) यांनी शिक्रापूर पोलीस स्टेशन येथे फिर्याद दिली. गुन्ह्याचा पुढील तपास पोलीस निरीक्षक हेमंत शेडगे यांच्या मार्गदर्शनाखाली पोलीस उपनिरीक्षक किरण भालेकर हे करत आहेत.