मंचरचा साखळीचोर पोलिसांच्या जाळ्यात

परिसरात वाढलेली गुन्हेगारी रोखण्यात पोलिसांना यश आले आहे. वृद्ध महिलांची दिशाभूल करून त्यांच्या गळ्यातील सोन्याचे दागिने लांबविणार्‍या भामट्यास मंचर पोलिसांनी सोमवारी जेरबंद केले आहे.

मंचर : परिसरात वाढलेली गुन्हेगारी रोखण्यात पोलिसांना यश आले आहे. वृद्ध महिलांची दिशाभूल करून त्यांच्या गळ्यातील सोन्याचे दागिने लांबविणार्‍या भामट्यास मंचर पोलिसांनी सोमवारी जेरबंद केले आहे. त्यामुळे वृद्ध महिलेचे ४० हजार रुपये किमतीचे दागिने चोरट्याच्या तडाख्यातून वाचले आहेत. यापूर्वी मंचर परिसरात झालेल्या चार लुटमारीचे प्रकार उघडकीस आले असल्याची माहिती मंचर पोलीस ठाण्याचे पोलीस निरीक्षक मोहन जाधव यांनी दिली. सुनील हरिश्चंद्र घोडेकर (वय ४७, रा. रूपी हाऊसिंग सोसायटी,रूपीनगर, हवेली मूळ गाव नांदुरकी फाटा, ता. संगमनेर) असे अटक केलेल्या आरोपीचे नाव आहे. पोलीस सूत्रांनी दिलेल्या माहितीनुसार सोमवारी सकाळी मंचरच्या पिंपळगाव चौकातून सुशीला विष्णू वायाळ (वय ६०, रा. गुळाणी, ता. खेड) पायी जात होत्या. त्या वेळी तुमचे लाईट बिल थकले आहे. मी वायरमन आहे. वीजबील भरा नाही तर वीजपुरवठा तोडू, त्यासाठी गळ्यातील सोन्याचे मंगळसूत्र द्या, असे सांगून चोरटा सुशिला यांच्या गळ्यातील सोन्याचे मंगळसूत्र घेत असताना गस्तीवर असलेले सहायक फौजदार आय. ए. सय्यद तेथे आले. त्यांनी चोरट्याला ताब्यात घेतले. जुन्नर न्यायालयाने आरोपीला गुरुवार (दि. २२) पर्यंत पोलीस कोठडीत ठेवण्याचा आदेश दिला आहे. पोलीस तपासात ते निष्पन्न झाले आहे. या आरोपीकडून अजूनही गुन्हे उघडकीस येण्याची शक्यता आहे. (वार्ताहर)