लोकमत न्यूज नेटवर्क
पुणे : महापालिका निवडणुकीला एक वर्ष राहिलेले असताना भाजपने आता आपली कामे लोकांपर्यंत पोहोचवायला शहरात होर्डिंग लावण्याचा सपाटा लावला आहे. होर्डिंगच्या माध्यमातून पुणेकरांपर्यंत कामे पोहोचवण्याचा प्रयत्न सत्ताधाऱ्यांनी चालू केला आहे. गमतीचा भाग म्हणजे हे कॅम्पेन थेट केंद्रातून राबवले जात असल्याचे सांगत शहर पदाधिकारी मात्र आपल्याला याचा काहीच पत्ता नसल्याचा दावा करत आहेत.
शहरातल्या प्रमुख चौकांमध्ये सध्या मोठी होर्डिंग झळकू लागली आहेत. ‘विकसित होत आहे आपलं पुणे. दृढ होतो आहे विकासकामांवरील विश्वास’, असा संदेश आणि भाजपचे चिन्ह त्यावर आहे.
शहरातल्या वेगवेगळ्या भागांतले हे फलक भाजपच्या महापालिका निवडणूक तयारीचाच भाग असल्याचे सांगितले जात आहे. पुढचे वर्षभर असेच फलक शहरभर लावले जाणार आहेत. अर्थात भाजपने जाहीरनाम्यात मांडलेले अनेक प्रकल्प अजूनही अपूर्ण आहेत. त्यामुळेच या जहिरातींच्या माध्यमातूनच पुन्हा प्रतिमा निर्माण करण्याचा प्रयत्न भाजपाने चालू केला आहे का, अशी चर्चा पुण्यात रंगली आहे.
या मोहिमेचा तपशील मात्र भाजप थेट केंद्रीय पातळीवरून ठरवत आहे. त्यामुळे शहरातील मोजक्या भाजपा पदाधिकाऱ्यांचा अपवाद वगळता इतरांना याचा काहीच पत्ता नाही. पुणे महापालिकेचे सभागृह नेते गणेश बीडकर म्हणाले, “आम्ही हैदराबाद सारख्याच ताकदीने मुंबई, पुणे महापालिकेची निवडणूक भाजपा लढवणार आहे. त्याचाच भाग म्हणून ही मोहीम राबवली जात आहे.”