‘रोप वे’स मिळणार गती

‘रोप वे’ या बहुचर्चित व बहुप्रतीक्षित प्रकल्पासाठीची जागा लोणावळा नगर परिषदेच्या नावे करण्याचा आदेश जिल्हाधिकारी सौरभ राव यांनी दिला आहे

लोणावळा : शहराच्या पर्यटन विकासाला गती देणारा लोणावळा नगर परिषदेचा खंडाळा ‘रोप वे’ या बहुचर्चित व बहुप्रतीक्षित प्रकल्पासाठीची जागा लोणावळा नगर परिषदेच्या नावे करण्याचा आदेश जिल्हाधिकारी सौरभ राव यांनी दिला आहे. ‘लाल फि ती’मध्ये अडकलेल्या ‘रोप वे’ प्रकल्पाच्या कामाला आता गती मिळणार आहे़ ‘रोप वे’च्या जागेसाठीची रक्कम व व्याजाची रक्कम शासनाच्या तिजोरीत भरल्यानंतरही जागा नगर परिषदेच्या नावे होत नव्हती, याकरिता तत्कालीन प्रभारी नगराध्यक्ष व विद्यमान उपनगराध्यक्ष प्रमोद गायकवाड व मुख्याधिकारी गणेश शेटे यांनी जिल्हाधिकार्‍यांकडे पाठपुरावा केला. तसेच लोकमतने २७ एप्रिलच्या अंकामध्ये प्रसिद्ध केलेल्या ‘लाल फि तीमध्ये अडकला रोप वे; पैसे भरूनही नगर परिषदेच्या नावे सातबारा नाही’ या वृत्ताची दखल घेत जिल्हाधिकार्‍यांनी हा आदेश दिला आहे़ पर्यटनाचे मध्यवर्ती केंद्र असलेल्या लोणावळा व खंडाळा या शहराच्या पर्यटन विकासाला मोठी गती देणारा खंडाळा-राजमाची ‘रोप वे’ हा एक महत्त्वाकांक्षी प्रकल्प लोणावळा नगर परिषदेने २००५ मध्ये करण्याचा ठराव केला़ यासाठी कुणेगाव येथील शासनाची सर्व्हे नं़ १४७/१ मधील १२ हेक्टर ४३ आर या जागेसाठी नगर परिषदेने ४ कोटी ९६ लाख रुपये २००९ मध्ये शासनाकडे जमा केले. मात्र रक्कम भरण्यास विलंब झाल्याचे कारण पुढे करत शासनाने या रकमेच्या व्याजापोटी पीएलआर दराप्रमाणे २ कोटी २२ लाख ७८ हजार ९३४ ही रक्कम भरल्याशिवाय सातबारा नगर परिषदेच्या नावे न करण्याचा आडमुठेपणा केला़ (वार्ताहर)