लोकमत न्यूज नेटवर्क
पुणे : पायाला जखम झाली असून, तिच्यावर उपचार करा, असा बहाणा करुन हॉस्पिटलमध्ये शिरलेल्या चौघांनी कंपाऊंडरला मारहाण करुन काऊंटरमधील ८ हजार रुपये तसेच इंजेक्शन, गोळ्या घेऊन दरोडा टाकून पळून गेले. ही घटना उंड्री येथील इंडस हॉस्पिटलमध्ये २२ जुलै रोजी मध्यरात्री बारा वाजण्याच्या सुमारास घडली. याप्रकरणी एका २४ वर्षांच्या तरुणाने फिर्याद दिली आहे. फिर्यादी हे इंडस हॉस्पिटलमध्ये कंपाऊंडर म्हणून नोकरी करतात. ते २२ जुलै रोजी रात्रपाळीला असताना मोटारसायकलवरून चौघे जण आले. आरोपींनी त्यांच्याकडे येऊन आमचे पायाला जखमी झाली आहे. त्यावर काहीतरी उपचार करा, असे सांगितले. उपचार करण्यासाठी फिर्यादी साहित्य शोधू लागले असताना आरोपींनी हॉस्पिटलमधील मेडिकलच्या काऊंटरमध्ये असलेले ८ हजार रुपये तसेच तेथील इंजेक्शन व औषधे असा १३ हजार रुपयांचा माल जबरदस्तीने काढून घेतला. फिर्यादी यांनी त्याला विरोध केला असता त्यांच्यातील एकाने फिर्यादी यांच्या डोक्यात खुर्ची फेकून तसेच लोखंडी पाईपाने मारहाण करुन जखमी केले. फिर्यादी यांच्यावर उपचार केल्यानंतर त्यांनी शनिवारी फिर्याद दिली असून सहायक पोलीस निरीक्षक आर. एस. मोहिते अधिक तपास करीत आहेत.