लोकमत न्यूज नेटवर्क
पुणे : आंबेगाव पठार येथे झालेल्या आपल्या भाच्याच्या खुनाचा बदला मामाने एका अल्पवयीन मुलाचा खून करून घेतला. पर्वती पायथा येथे रविवारी रात्री झालेल्या खुनाचे प्रकरण दत्तवाडी पोलिसांनी उघडकीस आणले असून, त्यात सहा जणांना अटक केली आहे.
सौरभ विनोद वीर ऊर्फ मोन्या, अक्षय विनोद वीर, वृषभ दत्तात्रय रेणुसे, सचिन ऊर्फ दादा पवार, आकाश नावाडे, स्वामी कांबळे अशी अटक केलेल्यांची नावे आहेत. सौरभ वाघमारे (वय १७, रा. जनता वसाहत) असे खून झालेल्या युवकाचे नाव आहे.
याप्रकरणी दादासो मारुती बनसोडे (वय २३, रा. लक्ष्मी कॉलनी, हडपसर) यांनी फिर्याद दिली आहे.
सौरभ वाघमारे याने आंबेगाव पठार येथे एप्रिल महिन्यात संग्राम लेकावळे याचा खून केला होता. त्यानंतर सौरभ हा आंबेगाव पठार सोडून जनता वसाहतीत राहायला आला. संग्राम याचा मामा वृषभ रेणुसे याने इतरांच्या मदतीने वाघमारे याच्या खुनाचा कट रचला. सौरभ याला जुना मोबाईल विक्री करण्याचा बहाणा करून रविवारी रात्री पर्वती पायथा येथे बोलावून घेतले. त्यानुसार सौरभ हा बनसोडे याला घेऊन पर्वती पायथा येथे आला. तो पायऱ्यांवर थांबला असताना तेथे दबा धरून बसलेले सौरभ वीर, अक्षय वीर व वृषभ रेणुसे यांनी त्यांच्याकडील कोयत्याने सौरभ वाघमारे याच्या डोक्यावर, पाठीवर व हातावर वार केले. इतरांनी सौरभला लाथाबुक्क्यांनी मारहाण केली. बनसोडे हा त्याला वाचविण्यासाठी सौरभला मारू नका, तो मरेल, असे ओरडत असताना सौरभ वीर याने त्याच्या पाठीवर कोयत्याने वार केला, तर स्वामी कांबळे याने त्याला लाथाबुक्क्यांनी मारहाण केली.
हा प्रकार सुरू असताना लोकांची गर्दी जमली. तेव्हा आरोपींनी नागरिकांना इथून निघून जा नाही तर तुम्हालाही मारून टाकू, अशी धमकी दिली. सौरभ हा रक्ताच्या थारोळ्यात पडल्यानंतर टोळके निघून गेले. पोलिसांना याची माहिती मिळाल्यानंतर पोलिसांनी आरोपींचा शोध घेऊन त्यापैकी ६ जणांना अटक केल्याचे दत्तवाडी पोलीस ठाण्याचे वरिष्ठ पोलीस निरीक्षक दत्ता इंदलकर यांनी सांगितले.
खुनाचा बदला खून
सौरभ वाघमारे आणि संग्राम लेकावळे हे दोघेही आंबेगाव पठार येथे राहत होते़ सौरभ हा लहान असल्याने संग्राम हा त्याला किरकोळ कामे सांगत तसेच येता जाता त्याची चेष्टा करून डोक्यात टपली मारत होता. त्याचा राग आल्याने सौरभने साथीदारांच्या मदतीने एप्रिल महिन्यात संग्राम याचा खून केला होता़ या प्रकरणानंतर सौरभ हा जनता वसाहतीत राहायला आला होता़ संग्रामचा मामा वृषभ रेणुसे याने भाच्याच्या खुनाचा बदला घेण्यासाठी कट रचून सौरभ वाघमारे याचा खून केल्याचे तपासात उघड झाले आहे.