'जानकीबाई केळकर' स्मृतिप्रीत्यर्थ 'उत्कृष्ट बालवाङ्मय दिवाळी अंकाचे पारितोषिक' 'छावा' या दिवाळी अंकाला तसेच दिवाळी अंकातील उत्कृष्ट कथेसाठीचे 'दि. अ. सोनटक्के पारितोषिक' 'साहित्यदीप' या दिवाळी अंकातील डॉ. भारती पांडे यांच्या 'प्रेम सेवा शरण' या कथेला जाहीर करण्यात आले आहे. तसेच उत्कृष्ट ललित लेखासाठीचे 'अनंत काणेकर पारितोषिक' 'साप्ताहिक सकाळ' या दिवाळी अंकातील आदिती पटवर्धन यांच्या 'विलक्षण ब्रम्हपुत्र' या लेखाला जाहीर करण्यात आले आहे. विविध विषयांना वाहिलेले दर्जेदार दिवाळी अंक प्रकाशित करणाऱ्या 'छंद' या दिवाळी अंकाचा विशेष सन्मान करण्यात येणार आहे.
या स्पर्धेचा पारितोषिक वितरण समारंभ गुरुवार, दि. २५ फेब्रुवारी रोजी सायंकाळी ५.३० वाजता साहित्य परिषदेच्या माधवराव पटवर्धन सभागृहात बालभारतीचे संचालक दिनकर पाटील यांच्या हस्ते व ज्येष्ठ कवी रामदास फुटाणे यांच्या अध्यक्षतेखाली होणार आहे. परिषदेचे प्रमुख कार्यवाह प्रकाश पायगुडे, कोषाध्यक्ष सुनीताराजे पवार या वेळी उपस्थित राहणार आहेत, अशी माहिती महाराष्ट्र साहित्य परिषदेचे कार्याध्यक्ष प्रा. मिलिंद जोशी यांनी दिली.
या स्पर्धेसाठी महाराष्ट्रातून ८४ दिवाळी अंक आले होते. या स्पर्धेसाठी परीक्षक म्हणून डॉ. गणेश राऊत, प्रभा सोनावणे आणि मृणालिनी कानिटकर यांनी काम पाहिले, असे कार्यवाह वि. दा. पिंगळे यांनी सांगितले.