लोकमत न्यूज नेटवर्क
लोणी काळभोर : चार अल्पवयीन मुलीस कुरकुरे देऊन खोलीत नेवून तिच्यावर बलात्कार केल्याची घटना उरूळी देवाची दूरक्षेत्राचे हद्दीत घडली आहे. आरोपी नराधमाने तिच्या ओठाला व गालाला चावून तिला गंभीर जखमी केले आहे.
मनुकुमार मनोज सिंग (वय २३, रा. मंतरवाडी, ता. हवेली, मूळ रा. बिहार) असे आरोपीचे नाव असून त्याला अटक करण्यात आली आहे. या प्रकरणी पीडित मुलीच्या आईने फिर्याद दिली आहे. पीडित मुलगी ही उस्मानाबाद जिल्ह्यातील असून तिचे वडील ड्रायव्हर म्हणून काम करतात. सुमारे २ वर्षांपासून ती आई, वडील व लहान भावासह या परिसरात राहत आहे. शनिवारी (दि.३) सकाळी ८.३० च्या सुमारास तिचे वडील कामावर गेले. दुपारी ३ च्या सुमारास आई घरात भांडी घासत होती.
त्यावेळी पीडित मुलगी आपल्या एक वर्ष वयाच्या भावासमवेत घराबाहेर पोर्चमध्ये खेळत होती. काही वेळानंतर आईने तिला आवाज दिला परंतु ती पोर्चमध्ये दिसली नाही म्हणून तिचा इकडे तिकडे शोध घेतला. तेव्हा इमारतीतील काही लोक बाहेर आले. तेव्हा मुलगी वरच्या मजल्यावरून खालच्या मजल्यावर येताना दिसली. आईने तिला घरात नेले व काय झाले विचारले असता तिने सांगितले की, मला वरच्या मनुने कुरकुरे देऊन त्याच्या खोलीत नेले. माझ्या ओठाला व गालाला चावला. यानंतर तिने संपूर्ण घटनाक्रम आईला सांगितला. तिचे वडील घरी आल्यावर तिच्या आईने घडलेला प्रकार सांगितला. दरम्यान पीडित मुलगी खूप दुखतंय असे म्हणून रडू लागली. तिच्या शरीराची आईने पाहणी केली. तिचे ओठ सुजले होते व त्यातून रक्त येत होते. गालाला चावलेल्या खुणा दिसत होत्या. तिला उपचारासाठी रुग्णालयात दाखल करण्यात आले. तपासणीनंतर डॉक्टरांनी तिच्यावर बलात्कार झाल्याचे सांगितले. यानंतर आईने पोलिसांत तक्रार केली. यानंतर पोलिसांनी आरोपीला अटक केली. त्यास न्यायालयाने ७ जुलैपर्यंत पोलीस कोठडीत ठेवण्याचे आदेश दिले आहेत.