बारामती अशोकनगरमधील प्रस्तावित

बारामती: शहरातील अशोकनगर या उच्चभ्रू वसाहतीमधील प्रस्तावित कोविड केअर सेंटरला स्थानिक नागरिकांनी विरोध केला आहे. या भागात दाट लोकवस्ती आहे. तसेच परिसरात ज्येष्ठ नागरिक,लहान मुलांची संख्या अधिक असल्याचे येथील नागरिकांचे म्हणणे आहे. परिणामी हा परिसर संक्रमित होण्याची भीती नागरिकांनी व्यक्त केली आहे. हे रुग्णालय सुरू करण्यासाठी नगरपालिकेसह, चीफ फायर ऑफिसर, महाराष्ट्र प्रदूषण नियंत्रण मंडळ यांची ना हरकत प्रमाणपत्रे उपलब्ध नाही,त्यानंतर देखील पोलीस बंदोबस्तात रुग्णालयाचे सामान आणले जात आहे. ६ एप्रिल रोजी संकल्प मेडीकल न्युट्रीशन थेरपी हॉस्पिटल या नावाचे कोणतेही हॉस्पिटल अशोकनगर भागात अस्तित्वात व कार्यरत नाही. तरीदेखील हे हॉस्पिटलचे अधिग्रहण करण्याचा आदेश उपविभागीय अधिका-यांकडून मिळविलेला आहे.परिसरातील रस्ता अरुंद आहे,त्यातुन वाहतुकीची कोंडी होण्याची शक्यता आहे. अग्निशमन विभागाची परवानगी नाही, आग लागून दुर्घटना घडल्यास कोण जबाबादारी घेणार, रस्त्याच्या रुंदीच्या निकषात रुग्णालय बसत नाही, इमारत जुनी व जीर्ण झालेली आहे अशा विविध कारणांमुळे हे सेंटर होऊ नये, अशी मागणी स्थानिकांनी केली आहे.निवासी भागात हे सेंटर उभे करण्यास या भागातील लोकांचा विरोध असून येथे हे सेंटर उभारू नये असे निवेदन उपविभागीय अधिका-यांना देण्यात आले आहे.