लोकमत न्यूज नेटवर्क
पुणे : पुण्यासह राज्यात झालेल्या अवकाळी पावसाचा फटका बसल्याने रविवारी मार्केट यार्डात कांदा व बटाट्याची आवक कमी झाली. यामुळे कांद्याच्या दरात वाढ झाली. तर
फळभाज्यांची आवक गेल्या आठवड्याच्या तुलनेत वाढल्याने टोमॅटो, फ्लॉवर, कोबी, घेवडा आणि परराज्यातील मटारच्या दरात घट झाली. अन्य सर्व फळभाज्यांचे भाव स्थिर होते.
गुलटेकडी येथील श्री छत्रपती शिवाजी मार्केट यार्डातील तरकारी विभागात रविवार (दि.१०) रोजी १०० ट्रक शेतीमालाची आवक झाली. परराज्यातून आलेल्या मालामध्ये राजस्थान येथून ९ ते १० ट्रक गाजर, गुजरात आणि कर्नाटकातून ४ ते ५ टेम्पो कोबी, आंध्र प्रदेश आणि तमिळनाडूतून ४ ते ५ टेम्पो शेवगा, गुजरात, मध्य प्रदेश आणि कर्नाटकातून १० ते १२ टेम्पो हिरवी मिरची, मध्य प्रदेशातून मटार १५ ते १६ ट्रक, मध्य प्रदेश आणि गुजरामधून ५ ते ६ ट्रक लसूण, आग्रा, इंदौर आणि स्थानिक परिसरातून बटाट्याची ३० ट्रक इतकी आवक झाली आहे़
स्थानिक भागातून झालेल्या आवकेमध्ये सातारी आले ११०० ते १२०० गोणी, कोबी सुमारे ५ ते ६ टेम्पो, प्लॉवर ८ ते १० टेम्पो, भेंडी ७ ते ८ टेम्पो, गवार ५ ते ६ टेम्पो, सिमला मिरची १० ते १२ टेम्पो, टोमॅटो १० ते १२ हजार पेटी, भुईमुग शेंगा ७० ते ८० पोती, तांबडा भोपळा ८ ते १० टेम्पो, हिरवी मिरची ३ ते ४ टेम्पो, गवार ५ ते ६ टेम्पो, कांदा १०० ट्रक इतकी आवक झाली.
--
भाजीपाला घाऊक दर किरकोळ दर
कांदा २२-३५ ३०-५०
बटाटा १५-२५ २०-३५
टोमॅटो ०६-०८ १०-१५
भेंडी २०-३० २४-४०
गवार ३९-४० ४०-५०
मिरची २०-२५ २५-३०
कोथिंबीर ०७-१० १०-१५
मेथी ०७-०८ १०-१५
मटार १५-२० २५-३०
--
मेथी, शेपू, कांदापात, चाकवत, चुका, चवळई आणि पालकाचे घटले
मार्केट यार्डात आवक वाढल्यामुळे मेथी, शेपू, कांदापात, चाकवत, चुका, चवळई आणि पालकच्या भावात घट झाली आहे, तर मागणी वाढल्यामुळे कोथिंबीर, राजगिरा आणि हरभरा गड्डीच्या भावात वाढ झाली असून शेपू, करडई, पुदीना, अंबाडी आणि मुळे यांचे भाव स्थिर असल्याची माहिती व्यापाऱ्यांनी दिली.
घाऊक बाजारात मेथीचे दर २ रुपये, कांदापात ६ रुपये, चाकवत ३ रुपये, चुका ४ रुपये, चवळई ६ रुपये आणि पालक ४ रुपयांनी जुडीमागे उतरले आहेत. तर कोथिंबीर, राजगिरा आणि हरभरा गड्डीचे दर प्रत्येकी एक रुपयांनी वाढले आहेत. येथील बाजारात रविवारी कोथिंबीरीची दीड लाख, मेथीची १ लाख तर हरभरा गड्डीचे ५० हजार जुडींची आवक झाली.
--
आवकाळी पावसामुळे कांद्याची आवक घटली
पुण्यासह राज्यात अनेक ठिकाणी आवकाळी पाऊस झाला. याचा फटका कांदा उत्पादक शेतकऱ्यांना बसला आहे. रविवारी मार्केट यार्डात कांद्याची आवक कमी झाली. यामुळेच नवीन कांद्याच्या दरात काही प्रमाणात वाढ झाली. यंदा पावसाचा मोठा फटका कांदा पिकाला बसला आहे. यामुळे पुढील काही दिवस दरात सतत चढ-उतार होत राहील.
- रितेश पोमण, कांद्याचे व्यापारी