लोकमत न्यूज नेटवर्क
पुणे : बाजारात फळभाज्यांची आवक गेल्या आठवड्याइतकी आहे. मात्र, मागणी वाढल्याने काकडी, फ्लॉवर, मटार आणि पावट्याच्या दरात वाढ झाली, तर कांद्याच्या दरात घसरण झाली आहे. अन्य सर्वच फळभाज्यांचे दर स्थिर असल्याची माहिती व्यापारी विलास भुजबळ यांनी दिली.
गुलटेकडी येथील श्री छत्रपती शिवाजी मार्केट यार्डातील तरकारी विभागात रविवार (दि. २८) रोजी ८० ते ९० ट्रक शेतीमालाची आवक झाली. यात परराज्यातून आलेल्या मालामध्ये राजस्थान येथून १० टेम्पो गाजर, गुजरात आणि कर्नाटकातून ३ ते ४ टेम्पो कोबी, आंध्र प्रदेश आणि तामिळनाडूतून ३ ते ३ ते ४ टेम्पो शेवगा, कर्नाटक गुजरात आणि आंध्रप्रदेशातून १० ते १२ टेम्पो हिरवी मिरची, राजस्थान आणि मध्यप्रदेशातून मटार १० ते १२ ट्रक, मध्यप्रदेश आणि गुजरातधून १४ ते १५ ट्रक लसूण, आग्रा, इंदूर आणि स्थानिक परिसरातून बटाट्याची ३० ते ३५ ट्रक इतकी आवक झाली आहे.
स्थानिक भागातून झालेल्या आवकेमध्ये सातारी आले १३०० ते १४०० गोणी, कोबी सुमारे ५ ते ६ टेम्पो, फ्लॉवर ८ ते १० टेम्पो, भेंडी ५ ते ६ टेम्पो, गवार ५ ते ६ टेम्पो, सिमला मिरची १० ते १२ टेम्पो, टोमॅटो ७ ते ८ हजार पेटी, तांबडा भोपळा ७ ते ८ टेम्पो, हिरवी मिरची ३ ते ४ टेम्पो, पावटा ३ टेम्पो, मटार ३० ते ४० गोणी, भुईमुग शेंग ३० ते ४० गोणी, गावरान कैरी २ टेम्पो, कांदा ७० ट्रक इतकी आवक झाली.
------
भाजीपाला घाऊक दर किरकोळ दर
कांदा १२-२७ २५-५०
बटाटा ०८-१२ १५-३०
टोमॅटो ०६-१० १५-२५
भेंडी ३०-४५ ४०-५०
गवार ३५-४० ४०-५०
मिरची ३५-५५ ४५-६०
कोथिंबीर ०७-१० १०-१५
मेथी ०३-०७ १०-१५
मटार २५-२६ ४०-५०
गाजर १५-१८ २०-२५
---
पालेभाज्यांचे दर घसरले
मार्केट यार्डात रविवारी कोथिंबीर, कांदापात, करडई, अंबाडी, राजगिरा, हरभरा गड्डीच्या दरात घसरण झाली. तर चुका आणि चवळईच्या दरात वाढ झाली. मेथी, शेपू, पुदीना, मुळे आणि पालकचे दर मात्र स्थिर असल्याची माहिती व्यापाऱ्यांनी दिली. रविवारी मार्केटयार्डात कोथिंबिरीच्या पावणेदोन लाख जुड्यांची, मेथीची ७० हजार जुड्यांची तर हरभऱ्याची ८ ते १० हजार गड्डींची आवक झाली.
कोथींबीरीच्या भावात घाऊक बाजारात तब्बल ६ हजार रुपयांची, कांदा पात, चाकवत आणि राजगिऱ्याच्या भावात प्रत्येकी दोन रुपयांची तर करडई आणि अंबाडीच्या दरात प्रत्येकी एक रुपयांची घसरण झाली आहे. तर चुका आणि चवळईच्या भावात प्रत्येकी एक रुपयांनी वाढ झाली आहे.