पुणे : धनाढ्य असल्याचे भासवून रोख खरेदी करायची, शोरूमधील कर्मचार्यांचा विश्वास संपादन करायचा आणि नंतरच्या भेटीत महागड्या मोबाईलसाठी तोकडी रक्कम देऊन गायब व्हायचे. मोबाईल निम्म्या किमतीला विकून पैसा कमवायचा, अशी कार्यपद्धती असलेल्या चलाख बदमाषासह चौकडीवर चतु:शृंगी पोलिसांनी पाश आवळले. त्यातील २ आरोपींनी अटकपूर्व जामीन मिळविल्याने त्यांना अटक करता आलेली नाही. मनीषकुमार, रिवश, सुशील कुमार आणि रिद्ध राजाधान (गुरगाव, हरयाना) अशी आरोपींची नावे आहेत. या प्रकरणाचा तपास करणारे फौजदार राजाराम चौहान यांनी सांगितले की सुशीलकुमार हा मनीषकुमार आणि रिवश यांचा पिता आहे. श्रीमंत असल्याचे भासवून मोबाईल दुकानात रोख खरेदी करायची, आपला जवळच बंगला असल्याचे सांगायचे, नंतर कर्मचार्यांचा विश्वास संपादन करून आणखी खरेदी करायची. त्या वेळी किरकोळ पैसे देऊन बाकीचे पैसे बंगल्यावर येऊन घेऊन जा, असे सांगायचे, गायब होऊन नवे कोरे मोबाईल ओळखीच्या लोकांना कमी किंमतीला विकून माया गोळा करायची, या पद्धतीने या कुटुंबाने फसवेगिरी केली. रिद्ध ही मनीषकुमार याची पत्नी आहे. मनीषकुमार याच्यावर हैदराबाद येथे अनेक गुन्हे दाखल आहेत. पुण्यात कोंढवा, वानवडी या ठिकाणीही गुन्हे दाखल आहेत. औंधमधील क्रोमा शोरूममध्ये ५ लाख ४२ हजार रुपये किमतीचे १५ मोबाईल केवळ ४९ हजार रुपयांत मनीषकुमार याने खरेदी केले. ४ लाख ९२ हजार रुपये मागण्यासाठी शोरूमचा कर्मचारी गेला असता आरोपींचा ठावठिकाणा मिळून आला नाही. याच आरोपींनी आठ ते नऊ जणांना परदेशवारी स्वस्तात, चाळीस टक्के कमी तिकीटदरात घडवून आणण्याचे आमिष दाखवून त्यांच्याकडून ४० लाख ४६ हजार रुपये उकळले. याही प्रकारात स्वखर्चाने काही जणांना परदेशवारी घडवून आणायची आणि नंतर विश्वास संपादन करून कमी किमतीत सहल घडवितो, असे सांगून ११ लाख रुपये जमा करून पोबारा करण्याचे तंत्र वापरले. चौहान यांनी सांगितले की सुशीलकुमार यास अटक केली होती; मात्र त्यास जामीन मिळाला. अन्य आरोपींनी अटकपूर्व जामीन घेतल्याने त्यांना अटक करता आलेली नाही. मात्र, मनीषकुमार याच्यावर देशभरात ४० गुन्हे दाखल आहेत. त्याने बनावट कागदपत्रे तयार केली आहेत. दिल्लीत ३ मोटारी विकल्या आहेत. (प्रतिनिधी)
धनाढ्य असल्याची बतावणी करून गंडा
By admin | Updated: May 21, 2014 01:22 IST