नेहा सराफ
लोकमत न्यूज नेटवर्क
पुणे : पुण्यात आत्महत्या केलेल्या पूजा चव्हाण मृत्यू प्रकरणाशी संबंधित अनेक बाबी आता उजेडात येत आहेत. पूजाचा चुलत भाऊ विलास चव्हाण याला यंदाच्या जानेवारी महिन्यातच वनखात्याच्या पुणे कार्यालयात नोकरीला ‘चिकटवण्यात’ आले असल्याचे उघड झाले आहे.
पूजाचा मृत्यू ही हत्या की आत्महत्या याबद्दल अद्याप स्पष्टता आलेली नसताना या प्रकरणाशी संबंधित ऑडिओ क्लिप समाज माध्यमांत व्हायरल झाल्या. त्यानंतर या क्लीपशी संबंधित व्यक्तींचा शोध सुरू असल्याचे सांगितले जाते. त्याचवेळी पूजाचा भाऊ काही आठवड्यांपूर्वीच वनखात्यात नोकरीला लागला असल्याचे समोर आले आहे. विशेष म्हणजे पूजाचा मृत्यू झाल्यापासून तो नोकरीवर फिरकला नसल्याचे सांगण्यात येते. वनखात्याचे अधिकारी मात्र या संदर्भात उघडपणे बोलण्यास घाबरत आहेत. दरम्यान वनखात्याची जबाबदारी संजय राठोड यांच्याकडे आहे.
पूजा लहू चव्हाण या २२ वर्षीय युवतीने पुण्यातील महंमदवाडी भागात पहिल्या मजल्यावरून उडी मारून आत्महत्या केली. या प्रकरणी वानवडी पोलिसांनी अकस्मात मृत्यूची नोंद केली. मात्र त्यानंतर तिच्याशी संबधित काही ऑडिओ क्लिप व्हायरल झाल्याने या प्रकरणाला नवे वळण मिळाले. या ऑडिओ क्लिपमध्ये विलास चव्हाणचा आवाज असल्याचे सांगितले जाते. पूजा पुण्यात भाऊ विलास चव्हाणसोबत राहत होती. बिल्डिंगमधल्या शेजाऱ्यांना विलासने पूजा त्याची बहीण असल्याचे सांगितले होते.
मृत्यूच्या जेमतेम एक आठवडा आधी पूजा पुण्यात वास्तव्यास आली होती. विलास मात्र जानेवारीपासून पुण्यात राहत होता. विलास पुण्यातील सामाजिक वनीकरण विभागात कामाला असल्याचे समोर आले आहे. तिथे तो शिपाई पदावर कार्यरत असून ८ फेब्रुवारीपासून कामावर गैरहजर असल्याचे वन विभागातील सूत्रांनी सांगितले आहे. जानेवारीपासून तो तिथे नोकरीला असला तरी त्याची थेट भरती करण्यात आलेली नाही. मनुष्यबळ पुरवणाऱ्या कंपनीच्या माध्यमातून विलासला नोकरी देण्यात आली होती.
कार्यालयात त्याची वागणूक अत्यंत सामान्य होती. त्याच्याविषयी बातम्यांमधूनच माहिती समजल्याचे वनविभागातील सूत्रांनी सांगितले. पूजा मृत्यू प्रकरणाशी संबंधित व्यक्तींचे जबाब पुणे पोलिसांनी नोंदवले आहेत. त्यात विलासाचाही समावेश असल्याचे सांगितले जाते. विलासला वनखात्यात कोणी नोकरी दिली, पूजाच्या मृत्यूनंतर व्हायरल झालेल्या ऑडिओ क्लिपमधला आवाज विलासचाच आहे का, विलास कोणाच्या इशाऱ्यावर काम करत होता, या बाबतचे गूढ कायम आहे.