पिंपरी-चिंचवडकरांच्या पैशाची उधळपट्टी

पिंपरी-चिंचवडच्या महापौर शकुंतला धराडे एका नगरसेविकेसह युरोपमधील स्पेन देशाच्या दौऱ्यावर जाणार आहेत, तर वृक्ष प्राधिकरण समितीतील १३ नगरसेवक या महिनाअखेरीस दक्षिण

पिंपरी : पिंपरी-चिंचवडच्या महापौर शकुंतला धराडे एका नगरसेविकेसह युरोपमधील स्पेन देशाच्या दौऱ्यावर जाणार आहेत, तर वृक्ष प्राधिकरण समितीतील १३ नगरसेवक या महिनाअखेरीस दक्षिण भारताच्या अभ्यास दौऱ्यावर जाणार आहेत. स्थायी समितीने दौऱ्यासाठी सुमारे साडेसहा लाखांच्या खर्चाच्या ऐनवेळच्या प्रस्तावाला मंगळवारी मान्यता दिली. मात्र, पिंपरी-चिंचवडकरांच्या पैशातून दौरे करण्याऐवजी स्वखर्चातून दौरे करावेत, असा सवाल नागरिकांनी उपस्थित केला आहे. स्थायी समिती सभापती अतुल शितोळे यांच्या अध्यक्षतेखाली बैठक झाली. महापौर धराडे तीन महिन्यांपूर्वीच जपान दौऱ्यावर गेल्या होत्या. यास तीन महिने पूर्ण होत नाहीत, तोच आता युरोपमधील स्पेन देशाच्या दौऱ्यावर निघाल्या आहेत. स्पेनमधील बर्सिलोना शहरात ‘स्मार्ट सिटी एक्स्पो वर्ल्ड काँग्रेस २०१५’ या परिषदेचे आयोजन करण्यात आले आहे. या परिषदेसाठी धराडे १७ ते १९ नोव्हेंबर या दरम्यान स्पेनला जाणार आहेत. त्यांच्यासोबत स्थायी समितीच्या सदस्या सविता साळुंके या असणार आहेत. पिंपरी-चिंचवड शहराचा केंद्र सरकारच्या ‘स्मार्ट सिटी’ योजनेत समावेश नसताना महापौर ‘स्मार्ट सिटी’ विषयावर आयोजित परिषदेला उपस्थिती लावणार असल्याने आश्चर्य व्यक्त होत आहे. दरम्यान, या दौऱ्यासाठी येणाऱ्या खर्चाला स्थायी समितीच्या सभेत मंगळवारी ऐनवेळच्या प्रस्तावाद्वारे मंजुरी देण्यात आली. यासह वृक्ष प्राधिकरण समितीच्या तेरा नगरसेवकांसाठीही दक्षिण भारत अभ्यास दौऱ्याचे आयोजन करण्यात आले आहे. हे नगरसेवक २८ सप्टेंबर ते २ आॅक्टोबर या दरम्यान हा अभ्यास दौरा करणार आहेत. यासाठी येणाऱ्या खर्चालाही स्थायी समितीने ऐनवेळच्या प्रस्तावाद्वारे मंगळवारी मंजुरी दिली आहे. अशा पध्दतीने नागरिकांच्या पैशातून विकासकामे करण्याऐवजी दौऱ्यावर उधळपट्टी करणे चुकीचे आहे. त्याऐवजी महापौर व नगरसेवकांनी स्वखर्चातून अभ्यास दौरे करावेत, असे नागरिकांचे म्हणणे आहे. (प्रतिनिधी) विविध विकासकामांसाठी साडेपाच कोटी खर्चास मान्यता पिंपरी : विविध विकासविषयक कामांसाठी येणाऱ्या सुमारे ५ कोटी ४० लाख रुपयांच्या खर्चास मंगळवारी स्थायी समिती सभेत मंजुरी देण्यात आली. निगडी ते दापोडी रस्त्यावर स्थापत्यविषयक कामे करणे, प्रभाग क्र.५०, ५१ मध्ये अंतर्गत रस्ते तसेच विकास आराखड्यातील उर्वरित रस्ते हॉटमिक्स पद्धतीने डांबरीकरण करणे, प्रभाग क्र. २४ मधील श्रीधरनगर, माणिक कॉलनी परिसरातील रस्त्यांचे डांबरीकरण करणे, प्रभाग क्र. ५३ वाकड ते इडन सोसायटीपर्यंतचा रस्ता डांबरीकरण करणे, प्रभाग क्र. ५३ वाकड स्पेसिया हौसिंग सोसायटी, साई ओझोन, वर्व सोसायटीपर्यंतचा रस्ता दुरुस्त करण्यासाठी येणाऱ्या खर्चासही बैठकीत मान्यता देण्यात आली. यासह प्रभाग क्र. ४७ मध्ये जोतिबानगर, काळेवाडी गावठाण येथील जलनि:सारण नलिकांची सुधारणा करणे, वॉर्ड क्र. ४८ मध्ये श्रीनगर, तापकीरनगर मधील जलनि:सारणविषयक सुधारकामे करणे, ड क्षेत्रीय कार्यालयातील प्रभाग क्रमांक ४३, ४४, ४६, ४७ मधील डे्रनेज लाईन व चेंबर्सची देखभाल व दुरुस्ती करणे यासाठी येणाऱ्या खर्चासही या बैठकीत मान्यता देण्यात आली.