लोकमत न्यूज नेटवर्क
पुणे : कोंढव्यातील एका ८ वर्षांच्या मुलीचा तिची सावत्र आई छळ करीत होती. तिला जेवायला न देता मारहाण करून हकलून दिले होते. त्यामुळे ती बाहेर फिरत होती. रात्रीच्या वेळी तिने एका घरात पिण्यासाठी पाणी मागितले. तेव्हा घरातील माउलीने तिची चौकशी केल्यावर सावत्र आई छळ करीत असल्याचे समजले. या वेळी या माउलीची लहान मुलगी तेथेच होती. तिला चाइल्ड हेल्पलाईनचा नंबर माहिती होता. तिने दुसर्या दिवशी चाइल्ड हेल्पलाईनला फोन करून या मुलीची माहिती दिली.
हा कॉल पुण्यातील ज्ञानदेवी चाइल्ड हेल्पलाईनकडे आला. त्यांनी कोंढवा पोलिसांच्या मदतीने भाग्योदयनगर येथील या मुलीचे घर शोधून काढले. तिच्या आई-वडिलांना विचारणा केली. पण, ही मुलगी सावत्र आईच्या त्रासाला इतकी कंटाळली होती. तिने त्यांच्याबरोबर राहण्यास नकार दिला. मुलीला सुरक्षितपणे ठेवण्यात आले आहे. अर्पणा मोडक यांच्या फिर्यादीवरून कोंढवा पोलिसांनी दोघांवर गुन्हा दाखल केला आहे.
दुसर्या एका घटनेत सावत्र वडिलाविरुद्ध गुन्हा दाखल करण्यात आला आहे. सावत्र वडिलांकडून ११ वर्षांच्या मुलीला आंब्याच्या पेटीच्या फळीने मारहाण करून तिला जखमी केल्याचे फोटो एका नागरिकांने पोलीस आयुक्त अमिताभ गुप्ता यांच्या ट्वीटर अकाऊंटवर टाकण्यात आले होते. पोलीस आयुक्तांनी त्याचा तपास करण्याचे आदेश दिले होते. आहिलखान हा गेल्या ६ महिन्यांपासून आपल्या सावत्र मुलीला लाथाबुक्क्यांनी मारहाण करीत होता. वेळोवेळी जेवण न देता उपाशी ठेवत होता. दोन्ही घटनांमध्ये ज्युवेनाईल जस्टीस अॅक्टखाली गुन्हा दाखल करण्यात आला आहे.
..........
१०९८
अल्पवयीन मुलांचा छळ होत असेल. त्यांना कामाला जुंपले जात असेल तर त्यांच्यावरील अन्याय दूर करून त्यांना मदत करण्यासाठी देशभरात चाइल्ड हेल्पलाईन सुरू करण्यात आली आहे. देशभरातील विविध शहरांमध्ये स्वयंसेवी संस्था त्यांचे काम पहातात. पुण्यात ज्ञानदेवी हेल्पलाईन संस्था हे काम पहाते. लहान मुलांवर अन्याय, अत्याचार होत असल्याचे दिसताच या हेल्पलाईनवर संपर्क साधून माहिती द्यावी.