शिवसेनेची टक्केवारी घटली

शेतकरी कामगार पक्षाची साथ नसताही मावळात शिवसेनेच्या मतांत वाढ झाली असली तरी, एकूण झालेल्या मतदानाच्या टक्केवारीत घट झाली आहे

पिंपरी : शेतकरी कामगार पक्षाची साथ नसताही मावळात शिवसेनेच्या मतांत वाढ झाली असली तरी, एकूण झालेल्या मतदानाच्या टक्केवारीत घट झाली आहे. राष्टÑवादी कॉँग्रेसच्या मतांमध्ये विभाजन झाल्याने त्यात लक्षणीय घट झाली. शिवसेनेने ११ लाख ७४ हजार ३३५ पैकी तब्बल ५ लाख १२ हजार २२६ मते मिळाली. एकूण मतांपैकी ही ४३.६१ टक्के मते आहेत. पक्षाने १ लाख ४७ हजार ३६९ मते अधिक असली तरी तुलनेत मतांची टक्केवारी ७.३१ ने घटली आहे. गेल्या वेळेस ७ लाख १६ हजार ५५५ मतांपैकी ३ लाख ६४ हजार ८५७ मते मिळविली होती. राष्टÑवादीला तिसर्‍या क्रमांकाची १५.५२ टक्के १ लाख ८२ हजार २९३ मते मिळाली. गेल्या वेळच्या तुलनेत १ लाख १ हजार ९४५ मतांची घट झाली आहे. शेकापचे आमदार लक्ष्मण जगताप यांनी मनसेच्या पाठिंब्यावर दुसर्‍या क्रमांकाची ३ लाख ५४ हजार ८२९ मते खेचली. ही राष्ट्रवादीपेक्षा दुप्पट ३०.२१ टक्के मते आहेत. बहुजन समाज पक्षाला यंदाही फारशी लक्षणीय कामगिरी करता आली नाही. २५ हजार ९८२ मतांवर (२.२१ टक्के) ‘हत्ती’ला समाधान मानावे लागले. गेल्या वेळेस २० हजार ४५५ मतांत ५ हजार ५२७ इतकी किरकोळ वाढ झाली. आपचे मारुती भापकर यांनी ३० हजार ५६६ मतांपर्यंत (२.६० टक्के) मजल मारली. गेल्या वेळेस अपक्ष भापकरांना ८ हजार ७६० (१.२२ टक्के) मते होती.(प्रतिनिधी)