रांजणगाव गणपती : तालुक्यात प्रथमच ऑनलाईन पद्धतीने राष्ट्रीय विज्ञान दिनाचे आयोजन करण्यात आले असून, शिरूर तालुक्यातील ९ शाळांनी यात आपला सहभाग घेतल्याचे समन्वयक उमेश साळवे व मुख्याध्यापक मारुती कदम यांनी सांगितले.
कोरोनाच्या पार्श्वभूमीवर राष्ट्रीय विज्ञान दिनानिमित्त शिरूर तालुक्यात मॅजिक बस फाउंडेशनच्या वतीने एकूण ७ गावांमधील २ हजार विद्यार्थ्यांकरिता विविध उपक्रमांनी विज्ञान दिन साजरा करण्यात आला.
राष्ट्रीय विज्ञान दिनाचे ऑनलाईन उद्घाटन करण्यात आले. याप्रसंगी संस्थेचे समन्वयक उमेश साळवे, मुख्याध्यापक मारुती कदम,रतन गावडे, अनिल शिंदे, विलास धामणे, भाऊसाहेब गवळी, रंजना वाखारे, अर्जुन चव्हाण, विलास जासूद आदी उपस्थित होते.
राष्ट्रीय विज्ञान दिवसाचे औचित्य साधून मॅजिक बस संस्थेच्या वतीने ऑनलाईन पद्धतीने राष्ट्रीय विज्ञान दिवस, विविध प्रकल्प, निबंध स्पर्धा, विज्ञान पोस्टर इ. उपक्रम घेण्यात आल्याचे भांबर्डे (ता. शिरूर) येथील न्यू इंग्लिश स्कूलचे मुख्याध्यापक मारुती कदम यांनी दिली. यामध्ये भांबर्डे, कान्हूर मेसाई, टाकळी हाजी, अण्णापूर, रामलिंग, सरदवाडी, कारेगाव या गावांतील प्राथमिक आणि माध्यमिक विद्यालयातील विद्यार्थ्यांनी सक्रिय सहभाग घेतला.
विद्यार्थ्यांना विज्ञान क्षेत्रात येण्यासाठी प्रोत्साहन मिळावे, विद्यार्थ्यांना विज्ञानाची आवड, जिज्ञासा, कुतूहल निर्माण व्हावे, त्यांचे विज्ञानाप्रती आकर्षण वाढावे, यासाठी हा दिवस साजरा केला.
.
शाळेत दैनंदिन अध्यापन प्रक्रियेत विज्ञान- परिसर अभ्यास विषयात आपली पृथ्वी, आपली सूर्यमाला हा घटक प्रभावीपणे शिकवताना तंत्रज्ञानाचा कल्पकतेने वापर करून शिक्षकांनी ‘एक्सप्लोअर फोर मर्ज क्यूब’ या मोबाईलचा कल्पकतेचा वापर केला. यामुळे सूर्य, बुध ,शुक्र,शनी, पृथ्वी ,मंगळ ग्रहांचा वर्गात प्रत्यक्ष थ्रीडी सूर्यमालाच विद्यार्थ्यांना अनुभवायला मिळाली, असे सागर म्हस्के या भांबर्डे शाळेतील विद्यार्थ्यांने सांगितले.
मॅजिक बस फाउंडेशनचे ऋषिकेश बोऱ्हाडे,राजेंद्र पिंगळे,प्रवीण मिडगुळे,कल्याणी जाधव,किरण गव्हाणे व गणेश पवार यांनी राष्ट्रीय विज्ञान दिन कार्यक्रमाचे नियोजन केले होते. कार्यक्रमाचे प्रस्ताविक पराग येवले यांनी केले व आभार रवींद्र शेळके यांनी मानले.
२८ रांजणगाव गणपती
भांबर्डे शाळेतील सागर म्हस्के या विद्यार्थ्यांने ॲपच्या साहाय्याने आपला ऑनलाईन विज्ञान प्रकल्प सादर केला.