जुन्या वादातून एकाचा खून करणार्‍यास अटक

जुन्या वादातून एका कुटुंबाला मारहाण करीत त्यातील एका ज्येष्ठाच्या मृत्यूस कारणीभूत ठरलेल्या फरारी आरोपीस हिंजवडी पोलिसांनी अटक केली.

पुणे : जुन्या वादातून एका कुटुंबाला मारहाण करीत त्यातील एका ज्येष्ठाच्या मृत्यूस कारणीभूत ठरलेल्या फरारी आरोपीस हिंजवडी पोलिसांनी अटक केली. न्यायालयाने त्याला पोलीस कोठडीत ठेवण्याचा आदेश दिला. सुरदेव रमेश नानावत ऊर्फ सौरदेव सिलोन नानावत (वय २१, रा. घोटावडे, ता. मुळशी) असे अटक करण्यात आलेल्या आरोपीचे नाव आहे. याप्रकरणी बबिताबाई लक्ष्मण मारवाडी कुंभार (वय ५८, रा. कासारसाई, ता. मुळशी) यांनी हिंजवडी पोलीस ठाण्यात फिर्याद दिली होती. त्यांचे पती लक्ष्मण अंतरीया मारवाडी कुंभार (वय ६५) यांचा आरोपींनी ५ मार्च रोजी मुळशी गावच्या हद्दीत लोखंडी पाईपने मारहाण करून खून केला होता. या गुन्ह्यात यापूर्वी आरोपीचे वडील सिलोन आणि भाऊ सुनील या दोघांना अटक केली असून ते न्यायालयीन कोठडीत आहेत. जागेच्या वादातून आरोपी आणि त्यांचा मेहुणा यांनी लक्ष्मण कुंभार यांना लोखंडी पाईप आणि बांबूने मारहाण केली. या वेळी मध्ये गेलेल्या फिर्यादी आणि त्यांचा मुलगा हिरो (वय ४०) यांनाही आरोपींनी मारहाण केली होती. यामध्ये ते गंभीर जखमी झाले होते, तर लक्ष्मण कुंभार यांचा घटनेनंतर उपचारादरम्यान दहा दिवसांनी मृत्यू झाला होता. घटनेनंतर अटक आरोपी फरार होता. त्यास तळेगाव दाभाडे पोलिसांनी अन्य एका गुन्ह्यात अटक केली असता त्याच्याकडून हा गुन्हा समोर आला. या गुन्ह्यात सहभागी असलेल्या आरोपीच्या मेहुण्याचा शोध घेणे, गुन्ह्यात वापरलेला गज जप्त करणे आणि फरार झाल्यानंतर आरोपी कोठे होता, याबाबत तपास करण्यासाठी त्याच्या पोलीस कोठडीची मागणी सरकारी वकील राजेंद्र सूर्यवंशी यांनी मागणी केली. न्यायालयाने ती मान्य केली. (प्रतिनिधी)