पिंपरी: पिंपरीत दिवसेंदिवस चोरी करण्याचे प्रमाण वाढू लागले आहे. अशातच एकाने धाडस करून थेट लेफ्टनंट कर्नलच्या बंगल्यात चोरी केली आहे. याप्रकरणी त्याला अटक करण्यात आली आहे. देहूरोड पोलीस ठाण्याच्या हद्दीत चिंचोली येथे मंगळवारी रात्री साडेआठच्या सुमारास ही घटना घडली.
प्रशांत तुकाराम जानराव (वय ३९, रा. कासारसाई), असे आरोपीचे नाव आहे. सैन्य दलात सुभेदार म्हणून कार्यरत असलेले भगवान नंदराम यादव (वय ४९, रा. चिंचोली) यांनी या प्रकरणी देहूरोड पोलीस ठाण्यात बुधवारी (दि. १४) फिर्याद दिली आहे.
पोलिसांनी दिलेल्या माहितीनुसार, अशोक नगर, चिंचोली येथे लेफ्टनंट कर्नल अरुण प्रकाश यांचा बंगला आहे. जानराव याने बंगल्याच्या बंद गेटमधून उडी मारून बंगल्यात प्रवेश केला. हाॅलमधील टेबलावर ठेवलेल्या पाकिटातील ५०० रुपये चोरून निघून गेला. ही बाब निदर्शनास आल्यानंतर यादव यांनी पोलिसांना फोनवरून माहिती दिली. त्यानंतर त्यांनी स्टाफच्या मदतीने शोध घेऊन आरोपीला पकडले आहे. त्याला अटक करून वडगाव मावळ येथील न्यायालयात हजर करण्यात आले. न्यायालयाने त्याची जामिनावर मुक्तता केली. पोलीस हवालदार अभि बनसोडे पुढील तपास करत आहेत.