पुणे : कोरोना विषाणूच्या नवा प्रकाराची लागण झाल्याचे आढळून आलेल्या त्या प्रवाशांसह अन्य कोणते प्रवासी विमानात होते, त्यापैकी किती जण पुण्यात आले व संबंधित बाधित किती जणांच्या संपर्कात आला याचा तपास पुणे महापालिकेच्या आरोग्य विभागाने सुरू केला आहे़
ब्रिटनहून पुण्यात आलेल्या व कोरोना विषाणूचा नवा प्रकार (स्ट्रेन) आढळून आल्याने पुणेकरांची चिंता वाढवणारा तो तरुण सध्या होम आयसोलेशनमध्ये आहे़ चौदाव्या व पंधराव्या दिवशी त्या तरुणाची कोरोना चाचणी निगेटिव्ह आल्याने सोमवारी त्यास नायडू रुग्णालयातून घरी सोडले आहे़ मात्र, पुढील दहा दिवस त्याला घराबाहेर पडता येणार नाही़
दरम्यान, १ डिसेंबरपासून ब्रिटनहून विमानाने शहरात आलेल्या प्रवाशांचा शोध घेतला जात असतानाच आता विशेषत: तो तरुण असलेल्या विमानातून १३ डिसेंबर रोजी मुंबईत अथवा पुण्यात अन्य कोणते प्रवासी आले आहेत का, त्यांचे पत्ते व संपर्क क्रमांक मिळावेत असे पत्र पुणे महापालिकेच्या आरोग्य विभागाने राज्य शासनाच्या कुटुंब कल्याण विभागाकडे मागविली आहे़