भीमाशंकर : पुणे वन्यजीव विभागाने सहा अभयारण्यांत बौद्ध पौर्णिमेच्या रात्री पाणवठ्यावर प्राणिगणना केली. यामध्ये नानज अभयारण्यात एक नर माळढोक पक्षी आढळून आला, तर भीमाशंकर अभयारण्यात बिबट्याच्या पाउलखुणा आढळून आल्या. मे महिन्यात येणार्या बौद्ध पौर्णिमेच्या रात्री जंगलांमध्ये पाणवठ्याच्या जागी मचान तयार करून त्यामध्ये रात्रभर बसून प्राणी गणना व निरीक्षण केले जाते. या वर्षी शेकरूसाठी प्रसिद्ध असलेल्या भीमाशंकर अभयारण्य क्र.१ व २, मोळढोकसाठी असलेल्या नानज/गंगेवाडी, काळविटांसाठी असलेल्या करमाळा, रेहेकूरी, चिंकारासाठी असलेल्या सुपे अभयारण्यात दि.१४ मे रोजी सायंकाळपासून, तर दि.१५ मे रोजी दुपारपर्यंत पाणवठ्याच्या जागी बसून ही गणना करण्यात आली. यामध्ये वनकर्मचारी व हौशी निसर्गप्रेमी सहभागी झाले होते. जंगलात असणार्या वन्यप्राण्यांची संख्या, प्रकार, प्रजाती यांचा अंदाज घेण्यासाठी, तसेच पाणवठ्याची सद्य:स्थिती जाणून घेण्यासाठी, वन्यप्राण्यांच्या संरक्षणाचा आढावा घेण्यासाठी ही प्रगणना केली जाते. भीमाशंकर अभयारण्य क्र.१ मध्ये २२ वनकर्मचारी व २२ निसर्गप्रेमी यांच्या साहाय्यााने प्रगणना करण्यात आली. प्रगणनेच्या दिवशी सायंकाळी भीमाशंकरमध्ये पाऊस पडल्याने व रात्री दाट धुके पसरल्याने प्रगणनेत अडचणी निर्माण झाल्या. रेहेकुरी अभयारण्य क्षेत्रामध्ये १५८ काळवीट दिसून आले. त्याचप्रमाणे या क्षेत्रात लांडगे, कोल्हे व खोकडही दिसले. सुपे अभयारण्य क्षेत्रामध्ये १९३ चिंकारा दिसले. यापैकी १५ पिले व १०९ माद्या होत्या. नानज/गंगेवाडी येथे अभयारण्यातील मार्डी भागात एक नर माळढोक पक्षी दिसून आला. (वार्ताहर)
भीमाशंकरमध्ये बिबट्याच्या पाऊलखुणा
By admin | Updated: May 20, 2014 23:20 IST