मंचर पोलिसांनी दिलेल्या माहितीनुसार, विकास सुरेश जाधव यांनी फिर्याद दिली आहे. जाधव यांची लालबाग प्राईड या इमारतीमध्ये सदनिका आहे. ते सध्या चाकण येथे राहत असल्याने ही सदनिका बंद होती. शनिवारी दुपारी तीन वाजण्याच्या सुमारास अज्ञात चोरट्याने बंद सदनिकेच्या दरवाज्याचा कडीकोयंडा तोडून आतमध्ये प्रवेश केला. घरातील कपाटात उचकापाचक करून ऐवज चोरून नेला आहे.जाधव यांच्या सदनिकेसमोरच गणेश निवृत्ती वामन यांची सदनिका आहे.या सदनिकेचा दरवाजा तोडून चोरट्यांनी ऐवज चोरून नेला आहे. पन्नास हजार रुपये रोख,दोन तोळे वजनाची सोन्याची साखळी, दोन कानातील कर्णफुले असा एकूण १ लाख ३५ हजार रुपयांचा ऐवज चोरीला गेला आहे.
चोरट्यांनी यावेळी सदनिकेतील आधारकार्ड,पॅनकार्ड,मतदान कार्ड, एटीएम कार्ड व गॅस कार्ड, वाहन परवाना आदी कागदपत्रे चोरून नेली आहेत.उपविभागीय पोलिस अधिकारी अनिल लंबाते,पोलीस निरीक्षक सुधाकर कोरे यांनी घटनास्थळी भेट देऊन पाहणी केली आहे.विकास सुरेश जाधव यांनी दिलेल्या फिर्यादीवरून पोलिसांनी अज्ञात चोरट्याविरुद्ध गुन्हा दाखल केला आहे. पुढील तपास मंचर पोलिस करत आहेत.