लोकमत नूज नेटवर्क
राजगुरूनगर: खेड तालुक्यातील पश्चिम भागातील १.५ टीएमसी साठवण क्षमता असणारे कळमोडी धरण पूर्ण क्षमतेने भरले आहे. धरणातून आरळा नदीत तीन हजार क्यूसेक्सने पाण्याचा विसर्ग सुरु करण्यात आला आहे. यामुळे प्रशासनाकडून नदीकाठच्या गावांना व नागरिकांना सतर्कतेचा इशारा देण्यात आला आहे.
जिल्ह्यात गेल्या दोन दिवसांपासून घाटमाध्यावर पावसाने दमदार हजेरी लावली आहे. खेड तालुक्यात कळमोडी धरणाच्या पाणलोट क्षेत्रातील खरपूड, परसूल, भोमाळे, घोटवडी परिसरात पडलेल्या जोरदार पावसामुळे धरण भरण्यात मोठी मदत झाली आहे. पाणीसाठ्यात झपाट्याने वाढ झाल्याने कळमोडी धरण ‘ओव्हर फ्लो’ झाले आहे. यामुळे चासकमान धरणातील पाणीसाठ्यातही वेगाने वाढ होणार आहे. चासकमान धरणातही १ टीमसीने वाढ झाली आहे. भामा आसखेड धरणही ५० टक्के भरले आहे. आराळा नदीच्या पाणीपातळीत वाढ झाली आहे. नदीकाठच्या लोकांनी नदीपात्रात जाऊ नये अशी सूचना प्रशासनानी दिली आहे.
चौकट
दरवाजा विरहित असलेल्या या धरणाच्या सांडव्यावरून सध्या तीन हजार क्यूसेकपेक्षा अधिक पाणी आरळा नदीपात्रात सोडण्यात येत आहे. या धरणाची एकूण पाणी साठवण क्षमता १.५ अब्ज घनफूट (टीएमसी) इतकी आहे. आरळा नदीत सोडलेल्या पाण्याचा चासकमान धरणात संचय होतो. गेल्या तीन दिवसांपासून चासकमान धरणाच्या पाणलोट क्षेत्रात विशेषतः भीमाशंकर, भोरगिरी, कारकुडी, मंदोशी, कुडे परिसरात सुरू असलेल्या संततधार पावसामुळे चासकमान धरणात झपाट्याने पाणीसाठा वाढत आहे.
फोटो : कळमोडी धरण पूर्ण क्षमतेने भरले असून धरणातून तीन हजार क्यूसेकने पाण्याचा विसर्ग सुरू आहे.