लोकमत न्यूज नेटवर्क
पुणे : गणपती बाप्पा मोरया, मंगलमूर्ती मोरया अन् पुढच्या वर्षी लवकर या, असा जयघोष करत रविवारी लाडक्या गणरायाला निरोप देण्यात आला. सकाळपासून पुण्यात गणपती विसर्जनाला सुरुवात झाली. पुण्याच्या वैभवशाली गणेशोत्सवात दरवर्षीच्या परंपरेनुसार महापौर मुरलीधर मोहोळ यांच्या हस्ते मानाचा पहिला श्री कसबा गणपतीला पुष्पहार अर्पण करण्यात आला. कार्यकर्ते, भक्तगण आणि नगारावादन करत बाप्पाला निरोप देण्यात आला. सकाळी ११.३० वाजता कसबा गणपतीचे विसर्जन झाले. गणरायांचे विसर्जन हौदांमध्ये करण्यात आले.
तांबडी जोगेश्वरी
मानाचा दुसरा गणपती श्री तांबडी जोगेश्वरी सार्वजानिक गणेशोत्सव मंडळाच्या गणपतीसमोर वल्लभभाई पटेल, बाबासाहेब आंबेडकर, विक्रम साराभाई, एम. विश्वेश्वरय्या अशा थोर पुरुषांच्या तसेच ऑलिंपिक व पॅरालिंपिक स्पर्धांमधील यशस्वी खेळाडू नीरज चोप्रा, अवनी लेखरा, सिन्घराज अधानी, भाविनाबेन पटेल, पी. व्ही. सिंधू यांच्या वेशभूषेतील कार्यकर्त्यांची उपस्थिती लक्षणीय ठरली. महापौर मोहोळ यांनी ‘श्रीं’ना पुष्पहार घातल्यानंतर मूर्ती चांदीच्या पालखीत विराजमान झाली. त्यानंतर मंडपासमोरील हौदात सकाळी ११.३२ वाजता विसर्जन करण्यात आले. पोलीस सहआयुक्त रवींद्र शिसवे हेसुद्धा उपस्थित होते.
गुरुजी तालीम मंडळ
मानाचा तिसरा श्री गुरुजी तालीम मंडळाच्या बाप्पाला महापौरांच्या हस्ते पुष्पहार अर्पण करण्यात आला. त्यानंतर ढोलताशांच्या गजरात अन् गुलालाची उधळण करत मंडपाजवळील कृत्रिम हौदात श्रींच्या मूर्तीचे १२.३८ वाजता विसर्जन करण्यात आले.
तुळशीबाग मंडळ
तुळशीबाग मंडळाने विसर्जनासाठी आकर्षक गजकुंड तयार करण्यात आला होता. श्रींची पालखीतून मंडपापासून विसर्जन कुंडापर्यंत श्रींची मूर्ती नेताना ढोल ताशांचा गजर करण्यात आला. दुपारी १.१६ वाजता श्रींचे विसर्जन करण्यात आले.
केसरीवाडा
मानाच्या पाचव्या केसरी गणपतीचं वेळेआधीच विसर्जन करण्यात आलं. १:२० मिनिटांनी महापौर मुरलीधर मोहोळ आणि पोलीस आयुक्त अमिताभ गुप्ता यांच्या उपस्थितीत गणरायाला निरोप देण्यात आला.
.......
तुळशीबाग गणपती मंडळाच्या ढोलताशा पथकाला पोलिसांनी रोखले
गणेश विसर्जनाच्या दिवशी पुण्यात मिरवणूक आणि वादनाला परवानगी नसतानाही मानाच्या चौथ्या गणपतीसमोर ढोलवादन करण्यात आले. या वेळी कोरोना नियमांचं उल्लंघन केल्याप्रकरणी पोलीस आणि कार्यकर्ते, वादक यांच्यात वाद निर्माण झाल्याचं दिसून आले. ‘आले, आले, रे तुळशीबागवाले आले, मंगलमूर्ती मोरया’च्या जयघोषात तुळशीबाग गणपतीचे विसर्जन करण्यात आले. यावेळी मंडळाचे नितीन पंडित म्हणाले, आता पोलिसांनी ढोल ताब्यात घेतले होते. आम्ही रीतसर २-२ ढोलताशांची परवानगी मागितली होती. त्यामुळे कारवाई होणार नाही. पोलिसांनी ढोल परत केल्याचंही त्यांनी या वेळी सांगितले.