पुणे : अनैसर्गिक पद्धतीने शरीरसंबंध ठेवले नाही तर आपण दोघे मोठ्या गाडीखाली आत्महत्या करू, अशी धमकी देत पत्नीवर अनैसर्गिकपणे लैंगिक अत्याचार करणाऱ्या पतीला हडपसर पोलिसांनी अटक केली आहे. न्यायालयाने आरोपीला १९ मेपर्यंत पोलीस कोठडी सुनावली आहे.
फलटण येथे राहणाऱ्या ३० वर्षीय विवाहितेने याबाबत फिर्याद दिली आहे. त्यानुसार तिचा ३३ वर्षीय पती, नणंद, सासरे आणि आणखी एका महिलेवर गुन्हा दाखल करण्यात आला आहे. ४ ऑक्टोबर ते ११ डिसेंबर २०२० दरम्यान हडपसरमधील काळेपडळमध्ये हा प्रकार सुरू होता. अनैसर्गिक पद्धतीने शरीरसंबंध ठेवले नाही तर आपण दोघे मोठ्या गाडीखाली आत्महत्या करू, अशी धमकी पती पत्नीला देत होता. पतीवर मानसोपचार तज्ज्ञांचे उपचार सुरू आहेत. मात्र पतीवर उपचार सुरू असल्याची बाब सासू-सासरे, नणंद यांनी लपवून ठेवली. तसेच माझा शारीरिक आणि मानसिक छळ केला म्हणून गुन्हा नोंदवत असल्याचे संबंधित विवाहितेने फिर्यादीत नमूद केले आहे. गुन्ह्याच्या पुढील तपासासाठी आरोपीला पोलीस कोठडी देण्यात यावी, अशी मागणी सरकारी वकील संतोषकुमार पाटाळे यांनी केली होती. ती न्यायालयाने मान्य केली आहे.
-----------------------------------------------------